ඕස්ට්‍රේලියාවේ වික්ටෝරියා ජනපදයේ වන්ගරට්ටා නම් ග්‍රාමීය ප්‍රදේශයේ ක්ෂණිකව වැවෙන තෘණ වර්ගයක් පැතිරීම නිසා ප්‍රදේශවාසීන් මහත් කරදරයකට මුහුණ දී තිබෙන බව බීබීසී පුවත් සේවය පවසයි.

ඉතා සීග්‍රයෙන් වැඩෙන බූව සහිත වල් පැලෑටිය ප්‍රදේශයේ ගෙමිදුල්, වාහන අංගන ආක්‍රමණය කරමින් වහල මට්ටමට තරම් ඉතා ඉහලට වැවෙන බව නිවැසියෝ පවසති. දිනපතා මෙම වල් පැලෑටිය විනාශ කිරීමට විශාල කාලයක් වැය කිරීමට සිදුවන බව ද ඔවුහු පවසති.

නගර සභාව පවසන්නේ මාර්ග අවහිර කරමින් පැතිරෙන මෙම තෘණ වර්ගය විනාශ කිරීමට විශාල වැකුම් යන්ත්‍ර යොදා ගැනීමටද සිදුව ඇති බවයි.

ඕස්ට්‍රේලියාවේ බොහෝ ප්‍රදේශවල දැකිය හැකි මෙම වල් පැලෑටිය වර්ෂාවකට පසුව එන වියලි කාළගුණික තත්ත්ව යටතේ මෙලෙස මහා පරිමානයෙන් ව්‍යාප්ත විය හැකි බව පරිසරවේදීහු පෙන්වා දෙති.