කඳුනගින්නන් අතර ජනප්‍රිය ඕස්ට්‍රේලියාවේ උරුළු කඳුවැටිය හෙට(26) දිනයේ සිට සංචාරකයන් සඳහා වසාදැමීමට තීරණය කර ඇති බැවින් අද බොහෝ පිරිස් කන්ද තරණය කිරීම සඳහා පැමිණ ඇතැයි වාර්තා වේ. 

ප්‍රවේශ පත්‍ර ලබාගැනීම සඳහා අලුයම් කාලයේ සිට දිගු පෝලිම් දක්නට ලැබුණු බව උද්‍යාන බලධාරීහු පවසති.

අයාස් පර්වතය ලෙස හැඳින්වුණු මෙම ශෛලමය කන්ද ස්වදේශික අනන්ගු ජනකොට්ඨාසයේ පූජනීය ස්ථානයකි. 

කන්ද සංචාරකයන්ගෙන් නිදහස් කර දෙන ලෙස එහි පාරම්පරික උරුමකරුවන් වන අනන්ගු ජනතාව දීර්ඝ කාලයක සිට ඉල්ලීම් කර තිබිණි. 

කෙසේවුවද කන්ද සංචාරකයන්ට තහනම් කරන බව ඕස්ට්‍රේලියානු රජය ප්‍රකාශයට පත්කරන ලද්දේ 2017 වර්ෂයේදී ය.

දැඩි සුළං හා අධික උෂ්ණත්වය හේතුවෙන් උරුළු පර්වතය තරණය කිරීම දුෂ්කර කාර්යයක් වන අතර කඳු නැගීමට ගිය සංචාරකයින් කිහිපදෙනකු මියගොස් ඇතැයි ද සඳහන් වේ.

(රොයිටර් පුවත් ඇසුරිණි - 085)