එක්සත් ජාතීන්ගේ මීළඟ මහ සමුළුවේදී සිරියානු රජයට එරෙහිව යෝජනාවක් ගෙන ඒමට ඇමෙරිකාව ඇතුළු බටහිර රටවල් මෙන්ම අරාබි ලීගය ද සූදානම් වෙයි.
එම යෝජනාව සකස් කර ඇත්තේ අරාබි ලීගයට අයත් රටවල්ය. සිරියානු ජනාධිපති බෂීර් අල් අසාද් චෝදනා කරන්නේ,  අරාබි ලීගය එම යෝජනාව සකස් කර ඇත්තේ ඇමෙරිකාව ප‍්‍රමුඛ බටහිර රටවල අවශ්‍යතාවන් සපුරා ගැනීමට කියාය.
මීට පෙර අවස්ථා දෙකකදී එක්සත් ජාතීන්ගේ ආරක්ෂක මණ්ඩලය සිරියාවට එරෙහිව යෝජනා දෙකක් ගෙන ඒමට උත්සහ කළේය. කෙසේ නමුත් රුසියාව සහ චීනය මැදිහත් වී එම යෝජනා පරාජය කළේය.
එක්සත් ජාතීන්ගේ මණ්ඩලය එම අවස්ථා දෙකේදීම උත්සහ කළේ සිරියාවට එරෙහිව හමුදා ප‍්‍රහාරයක් එල්ල කිරීමටය.
ලිබියාවට කළාක් මෙන් සිරියා රජය පෙරළා දැමීමට හමුදා ප‍්‍රහාරයක් එල්ල කිරීමෙන් වළකින්නැයි  රුසියාව සහ චීනය ඇමෙරිකාව ප‍්‍රමුඛ සෙසු බටහිර බලවතුන්ට අනතුරු අඟවා ඇත.
මේ අතර පෙරේදා (14) රුසියාවේ මොස්කව් නුවර සංචාරයකට පැමිණි ඊශ‍්‍රායල අගමැති බෙන්ජමින් නෙදන්යාහු එරට ජනපති ව්ලැඩිමීර් පුටින් හමුවී සිරියානු අර්බුදය සම්බන්ධයෙන් දීර්ග වශයෙන් සාකච්ඡා පැවැත්වීය.
ඇමෙරිකාවේ හිතවතා වන ඊශ‍්‍රායලය සිරියානු කැරැලිකරුවන්ට සහාය දෙයි. රුසියාව සහාය දෙන්නේ සිරියානු රජයටය. සිරියානු අර්බුදය සාර්ථකව විසඳීමට නොහැකි වී ඇත්තේ ලෝකය බල කඳවුරු දෙකකට වෙන් වී සිටීමටය.
සිරියානු අර්බුදය විසඳීම සම්බන්ධයෙන් බි‍්‍රතාන්‍ය අගමැති ඬේවිඞ් කැමරන්, ඇමෙරිකා රාජ්‍ය ලේකම් ජෝන් කෙරී ද මොස්කව් නුවරදී පසුගියදා ජනපති පුටින් හමුවී සාකච්ඡා කළේය.