බීජිංහිදීය (ඒ.එෆ්.පී)

සිය පළමු නිල විදෙස් සංචාරය සඳහා උතුරු කොරියානු නායක කිම් ජොන් උන් චීනයේ බීජිං අගනුවරට පැමිණි බවට ජපාන මාධ්‍ය අද (27) වාර්තා කළේය.
 
විශේෂ ගෞරවයක් සහිත ආරක්ෂාවක් යටතේ දුම්රියක් චීනයේ බීජිං නුවරට පැමිණීමත් පසුව එය පිටව යෑමත් සමඟ එම පුවත් පළ විය.
 
එම දුම්රියේ පැමිණ ඇත්තේ උතුරු කොරියානු නායකයා බව ද එම පුවත් වාර්තාවල දැක්විණි. චීනයේ බීජිං අගනුවර ස්ථාන කිහිපයකටම දැඩි ආරක්ෂාවක් ලබා දී තිබූ අතර බොහෝ ස්ථානවල පොලිස් ආරක්ෂක රථ සහ විශේෂ ප්‍රභූ ආරක්ෂිත රථ, පෙර ගමන් රථ දක්නට තිබිණි. 
 
මෙසේ විශේෂ ආරක්ෂාව ලබා දී තිබුණේ උතුරු කොරියානු නායකයා චීන ජනාධිපති ෂී ජින්පින්ග් හමුවට පැමිණි නිසා යැයි ජපාන මෙන්ම දකුණු කොරියානු මාධ්‍යය ද වාර්තා කර තිබිණි. 
 
උතුරු කොරියාවේ විශේෂ නියෝජිතයකු බීජිං නුවරට පැමිණි බව චීන රාජ්‍ය තාන්ත්‍රික නිලධාරීන් ප්‍රකාශ කළ ද පැමිණියේ කවුද යන්න නිශ්චිතව ප්‍රකාශ කළ නොහැකි බව එම නිලධාරීහූ ප්‍රකාශ කළහ. 
 
උතුරු කොරියානු නායකයා චීනයට පැමිණියා නම් එය සඟවන්නට හේතුවක් නැතැයිද ඒ පිළිබඳ තොරතුරු තිබුණා නම් ප්‍රසිද්ධියට පත් කරන බව ද නිලධාරීහු කීහ. 
 
චීනයට පැමිණ ගියේ උතුරු කොරියානු නායකයා නම් 2011 වසරේදී බලයට පත්වීමෙන් පසු හෙතෙම විදෙස් සංචාරයක නිරත වූ පළමු අවස්ථාව මෙය වනු ඇත. 
 
උතුරු කොරියානු නායකයාට චීන ජනාධිපතිවරයා හමුවීමට හේතු කිහිපයක්ම තිබේ. උතුරු කොරියානු නායකයා සහ දකුණු කොරියානු ජනාධිපති මූන් ජායි ඉන් සහ ඇමෙරිකා ජනාධිපති ඩොනල්ඞ් ට්‍රම්ප් අතර සාකච්ඡා පැවැත්වීමට නියමිතව තිබේ. 
උතුරු කොරියා නායකයා සහ ඇමෙරිකා ජනාධිපති ට්‍රම්ප් අතර සාකච්ඡාවට බොහෝ විට ලබන මැයි මාසයේදී පැවැත්වෙනු ඇතැයි ද උතුරු කොරියානු නායකයා සහ දකුණු කොරියානු ජනාධිපති මූන් ජායි ඉන් අතර හමුව අප්‍රේල් මස අගදී පැවැත්වෙනු ඇතැයි ද පැවසේ. 
 
055