ඊශ‍්‍රායල දේශසීමාවෙහි පිහිටි සීනායි ප‍්‍රදේශයට ඊජිප්තු හමුදා සහ ජෙට් යානා ඊයේ(8) එල්ල කළ ප‍්‍රහාරයකින් ඉස්ලාමීය සටන්කාමීහු 20 දෙනෙක් ජීවිතක්ෂයට පත් වූහ. සීනායි අර්ධද්වීපයට උතුරින් පිහිටි ප‍්‍රදේශයේ ගමන් කරමින් තිබූ ඉස්ලාමීය සටන්කාමීන්ගේ වාහන පෙළකට ඊජිප්තු ගුවන් හමුදාවේ හෙලිකොප්ටර් යානා ප‍්‍රහාරයක් එල්ල කර ඇතැයි විදෙස් මාධ්‍ය වාර්තා සඳහන් කරයි. අල් ටූමා ගැමි පෙදෙසට ඇතුළු වූ ඊජිප්තු හමුදා ත‍්‍රස්තවාදීන්ට අයත් සන්නද්ධ රථ තුනක් ද විනාශ කළ බව සීනායි අණදෙන නිලධාරියෙක් පැවැසීය. පසුගියදා ඉස්ලාමීය සටන්කාමීන් පිරිසක් විසින් ඊජිප්තු-ඊශ‍්‍රායල් දේශසීමාසන්නයෙහි සේවයේ යෙදී සිටි හමුදා භටයන් පිරිසක් ඝාතනය කිරීමෙන් අනතුරුව ඊජිප්තු හමුදාව මෙම මෙහෙයුම දියත් කළේය. මේ අතර පෙරේදා රාත‍්‍රියේ හඳුනා නොගත් සටන්කාමීන් පිරිසක් සිනායි ප‍්‍රදේශයේ හමුදා මුරපොළකට ප‍්‍රහාරයක් එල්ල කර ඇතැයි ඊජිප්තු හමුදා ප‍්‍රකාශකයෙක් කීයේය. ගාසා තීරයේ සිටින බෙඩුයින් සටන්කාමීන් සහ ඉස්ලාමීය අන්තවාදීන් විසින් මෙම ප‍්‍රහාර එල්ල කරන ලද බවට සැක කෙරෙන බව ඔහු වැඩිදුරටත් සඳහන් කළේය. ඊජිප්තු නව ජනපති මොර්සිගේ මුස්ලිම් සහෝදරත්ව පක්ෂය සහ ගාසා තීරයේ සිටින හමාස් සංවිධානය අතර පවතින යහපත් සබඳතා මෙම ගැටුම්කාරී තත්ත්වය නිසා අභියෝගයට ලක් වන බව විදෙස් විශ්ලේෂකයෝ පවසති. සටන්කාමීන් එල්ල කළ ප‍්‍රහාරයෙන් අනතුරුව ගාසා තීරයට පිවිසුම් මාර්ගය වන රෆා ප‍්‍රවේශ මාර්ගය වසා දැමීමට ඊජිප්තු රජය තීරණය කළේය. ඊශ‍්‍රායල පාලනය නොකරන පලස්තීනය බාහිර ලෝකය සමඟ සම්බන්ධ වන එකම ප‍්‍රවේශ මාර්ගය වන්නේ ද රෆා මාර්ගයයි.සටන්කාමීන්ගේ ප‍්‍රහාරයෙන් අනතුරුව වසා ඇති රෆා දේශසීමා මාර්ගය අසල සේවයේ නියුතු ආරක්ෂක භටයන්