ඉරාක රජයේ තෙල් සමාගමකට ඇතුළු නගර ගණනාවකට ඊයේ(9) ප‍්‍රහාර විස්සකට ආසන්න ගණනක් එල්ල වූ අතර ඉන් 52 දෙනෙක් ජීවිතක්ෂයට පත්ව 250 කට අධික පිරිසක් තුවාල ලැබූහ. මෙම ප‍්‍රහාරයත් සමඟ සැප්තැම්බර් මාසයේදී ඉරාකයේ ප‍්‍රචණ්ඩ කි‍්‍රයා හේතුවෙන් මියගිය ගණන 82 දක්වා ඉහළ ගිය බව එරට ආරක්ෂක අංශ පවසයි. ප‍්‍රබලම ප‍්‍රහාරය එල්ල වූයේ බැග්ඩෑඞ් නගරයට උතුරින් පිහිටි බලාඞ් නගරය සමීපයේ ඇති හමුදා මුරපොළකටය. ඊයේ මධ්‍යම රාති‍්‍රයේදී හමුදා මුරපොළට පැමිණි තුවක්කුකරුවකු වෙඩි වරුසාවක් එල්ල කරන අතරේ තත්ත්වය පාලනයට කිරීම පිණිස එම ස්ථානයට පැමිණෙමින් සිටි භට පිරිසක් ගමන්ගත් රථයක් මාර්ගය අසල අටවා තිබූ බෝම්බයකට ගොදුරු විය. එම සිද්ධියෙන් මියගිය 11 දෙනා අතර හමුදා නිලධාරීන් දෙදෙනකු ද සිටින බව ඉරාක හමුදා ප‍්‍රකාශකයෙක් පැවැසීය. උතුරු ඉරාකයේ කිර්කුක් නගරයේ පිහිටි එරට රජයට අයත් තෙල් සමාගමක් ඉදිරිපිටදී තවත් කාර් බෝම්බයක් පුපුරා ගොස් ඇත. ඉන් හත් දෙනෙක් ජීවිතක්ෂයට පත්ව 17ක් තුවාල ලබා ඇතැයි ඉරාක ආරක්ෂක අංශ පවසයි. ඊට අමතරව ටුස් කුමාර්ටු, බස්රා, නසිරියා, ටල් අෆාර් සහ සමාරා යන නගරවලින් ද ප‍්‍රචණ්ඩ කි‍්‍රයා වාර්තා වූ බවත් මෙම ප‍්‍රහාරවලට වගකිවයුත්තේ ඉරාකයේ කි‍්‍රයාත්මක ආගමික අන්තවාදීන් බව ඉරාක බුද්ධි අංශ සඳහන් කරයි. ඇමෙරිකා හමුදා ඉරාකය ආක‍්‍රමණය කිරීමෙන් අනතුරුව ඉරාකය තුළ සිදුවන ප‍්‍රචණ්ඩ කි‍්‍රයා දිනෙන්දින උත්සන්න විය. ඉකුත් අගෝස්තු මාසයේදී පමණක් ඉරාකයේ නගරවලට එල්ල වූ ප‍්‍රහාරවලින් 278 දෙනෙක් ජීවිතක්ෂයට පත් වූ බව ඉරාක ආරක්ෂක අංශ පවසයි.