ඉන්දියාවේ පාලනයට නතු කාශ්මීර ප‍්‍රදේශයට පැනැවූ ඇඳිරි නීතිය දිගටම කි‍්‍රයාත්මක කිරීමට තමන්ට සිදුවී ඇතැයි ප‍්‍රාන්ත බලධාරීහු පවසති. 
ඉන්දු කාශ්මීරයට ඇඳිරි නීතිය පැනවීමට බලධාරීන් පියවර ගත්තේ මීට සතියකට පෙර, ඉන්දීය රජය අෆ්තාල් ගුරු එල්ලා මරා දැමීමත් සමඟ හටගත් ප‍්‍රචණ්ඩ කි‍්‍රයා මැඬලීමටය.
2001 වසරේදී ඉන්දීය පාර්ලිමේන්තුවට එල්ල කළ ප‍්‍රහාරයට සම්බන්ධ චෝදනා ලැබ ඊට වරදකරු වූ බෙදුම්වාදී සටන්කාමියකු වන අෆ්තාල් ගුරුගේ මරණ දඬුවම කි‍්‍රයාත්මක කෙරුණේ ඉකුත් 9 වැනිදාය.
මුස්ලිම් ජාතිකයකු වන ගුරු ඉන්දු කාශ්මීරයේ වැසියෙකි. ඉන්දීය පාර්ලිමේන්තුවට පහර දුන්නේ ලෂ්කාර් ඊ තයිබා සහ ජයිෂ් ඊ මොහොම්මද් නමැති බෙදුම්වාදී සටන්කාමී සංවිධානයයි. ගුරු ද එම සටන්කාමීන් සමඟ සම්බන්ධකම් පැවැත් වූ බව තහවුරු විය.
2004 වසරේ දී ඉන්දීය ශ්‍රේෂ්ඨාධිකරණය හමුවේ චෝදනාවලට වරදකරු වූ අෆ්තාල් ගුරු අට වසරක් මරණ දඬුවම නියමවූවන්ගේ ලැයිස්තුවේ සිටියේය. 
ගුරු එල්ලා මරා දැමීමත් සමඟ ඔහුගේ හිතවාදීහු ඔහු වීරයකු බව පවසමින් වීදි බැස ඉන්දීය මධ්‍යම රජයට එරෙහි විරෝධතා පෙළපාළි පවත්වන්න වූහ. විරෝධතාකරුවෝ අවස්ථා ගණනාවකදී පොලිසිය සහ හමුදාව සමඟ ගැටුම් ඇතිකර ගත්හ. ඇඳිරි නීතිය පැනැවීමට තීරණය කෙරුණේ ඒ අනුවය.