නවදිල්ලිහිදීය (ඒගඑෆ්ගපී)

ඊශ්‍රායලයෙන් ගොඩබිම සිට ගුවනට විදිය හැකි මිසයිල 131 ක් මිලදී ගැනීමට සූදානම් බව යැයි ඉන්දීය ආරක්ෂක අමාත්‍යාංශය නිවේදනය කර තිබේ. 

ඊශ්‍රායල රජයට අනුබද්ධිත රෆායල් ඇඞ්වාන්ස්ඩ් ඩිෆෙන්ස් සිස්ටම්ස් සමාගමෙන් ඉන්දියාව මෙම මිලදී ගැනීමට නියමිතය. මෙම සම්පූර්ණ ගිවිසුමේ වටිනාකම එක්සත් ජනපද ඩොලර් මිලියන 70ක් යැයි ද ඉන්දීය ආරක්ෂක අමාත්‍යාංශය සඳහන් කරයි. 

ඉන්දියාවට මිලදී ගැනීමට නියමිතව ඇත්තේබරාක්’ නැමැති මතුපිටක සිට ගුවනට විදිය හැකි මිසයිලය. එම මිසයිල ගුවනින් එල්ල විය හැකි තර්ජන වැළැක්වීමට යොදාගනී. ගුවන් යානා රැගෙන යා හැකි ඉන්දියාවට අයත් පළමු යුද නෞකාව මේ වනවිට නිෂ්පාදනය කරමින් තිබෙන අතර මෙම මිසයිල එම නෞකාවට යොදාගැනීමට නියමිත බව පැවසේ. 

මේ මස මැදදී ඊශ්‍රායල අග්‍රාමාත්‍ය බෙන්ජමින් නෙදන්යාහු ප්‍රමුඛ එරට රජයේ ප්‍රධානීන් සහ ව්‍යාපාරික කණ්ඩායමක් ඉන්දියාවේ සංචාරය කිරීමට නියමිතය. ඊශ්‍රායලය ඉන්දියාවේ ප්‍රමුඛතම ආරක්ෂක උපකරණ, ආයුධ සැපයුම්කරුවා වන අතර සාමාන්‍යයෙන් ඉන්දියාවට වසරකට ඩොලර් බිලියනයකට ආසන්න වටිනාකමකින් යුතු යුද උපකරණ ඊශ්‍රායලයෙන් මිලදී ගනී. 

වසර කිහිපයක් සඳහා මතුපිට සිට ගුවනට විදින මධ්‍ය දුර මිසයිල, සන්නිවේදන තාක්ෂණ උපකරණ ආදිය වෙනුවෙන් ඉන්දියාව පසුගිය වසරේ අප්‍රේල් මාසයේදී ඊශ්‍රායලය සමඟ ඇමෙරිකා එක්සත් ජනපද ඩොලර් බිලියන 2ක වටිනාකමකින් යුත් ගිවිසුමකට අත්සන් තබන ලදි. ඉන්දියාව මෙලෙස මිසයිල 131ක් මිලදී ගන්නේ එම ගිවිසුම යටතේ ද නව ගිවිසුමක් යටතේ ද යන්න පිළිබඳව නිශ්චිතව තොරතුරු අනාවරණය නොවිණි.
 
(055)