ඇදහැලෙන මහ වැසි හේතුවෙන් නැගෙනහිර ඉන්දියාවේ ප‍්‍රාන්ත රැසක් ඊයේ (12) ජලයෙන් යටවූ අතර ලක්ෂ ගණනකට උන්හිටිතැන් අහිමි විය. ජල ගැලීම් සහ නායයෑම්වලට හසුවීමෙන් මියගිය ගණන 18 කි. ජල ගැලීම් සහ නාය යෑම් හට ගත්තේ මෝසම් වැසි සමයත් සමඟ අධික වර්ෂාපතනයක් ඇතිවීම නිසා යැයි ඉන්දීය කලගුණ විද්‍යා ඒකක නිවේදනය කරයි. ජල ගැලීම්වලින් වැඩිපුරම හානි සිදුවී ඇත්තේ ඔරිස්සා ප‍්‍රාන්තයටය. ඔරිස්සා ප‍්‍රාන්ත බලධාරීන් ප‍්‍රකාශ කරන අන්දමට මේ වනවිට ගම්මාන 877 ක් මුළුමනින්ම ජලයෙන් යට වී තිබේ. තවත් ගම්මාන කිහිපයක් ජලයෙන් යට වීමේ අවදානමක් පැවැති හෙයින් 50,000 ක් දෙනා ආරක්ෂිත ස්ථාන වෙත යොමු කරවීමට බලධාරීහු පියවර ගත්හ. ජල ගැලීම්වලට හසු වීමෙන් පුද්ගලයන් සය දෙනකු අතුරුදන්ව ඇති බවත් ඔවුන් සෙවීමේ මෙහෙයුම් ඊයේ දවස පුරාම පැවැත්වූ බවත් වාර්තා විය. අධික වර්ෂාව එම සහන සේවා මෙහෙයුම්වලට බාධාවක් වූ බව ඔරිස්සා ප‍්‍රාන්ත බලධාරීහු පැවැසූහ.