ඉන්දියාවේ ඇසෑම් ප‍්‍රාන්තයේ සිවු දිනක් පුරා පැවැති වාර්ගික ගැටුම් හේතුවෙන් ජීවිතක්ෂයට පත් වූ ගණන ඊයේ(25) දිනයේදී 35 දක්වා ඉහළ ගොස් ඇති බවත් ඉන් 170,000ක් අවතැන්ව ඇති බවත් වාර්තා වේ. ඇසෑමයේ වෙසෙන බෝඩෝ ගෝත‍්‍රිකයන් සහ මුස්ලිම් පදිංචිකරුවන් අතර හටගෙන ඇති මේ ගැටුම්වලට මැදිව සිටින 170,000 ක් පමණ වන ජනතාවක් අවතැන්ව සිටින බව ඉන්දීය පොලිස් ප‍්‍රකාශකයෙක් පැවැසීය. ඔවුන් මේ වන විට ප‍්‍රදේශයේ පිහිටි පාසල් සහ රජයේ ගොඩනැඟිලි  වෙත යොමු කර ඇතැයි ද ඔහු වැඩිදුරටත් සඳහන් කළේය. දෙපාර්ශවය අතර පෙරේදා(24) රාත‍්‍රියේ හටගත් ගැටුම්වලින් 9 දෙනකු ජීවිතක්ෂයට පත්ව ඇත. පොලිසිය ඇඳිරිනීතිය පනවා දුටු තැන වෙඩි තබන බවට ද කලහකාරීන්ට අනතුරු අඟවා තිබුණේ එම පිරිස් ප‍්‍රදේශයේ පිහිටි නිවාස සහ වෙළෙඳසැල් ගිනිබත් කරමින් සිටි අවස්ථාවේදීය. මේ අයුරින් අනතුරු ඇඟවීමෙන් පසුව යම් පිරිසක් නිවසක් ගිනි තැබීමට උත්සාහ ගත් අවස්ථාවේ දී පොලිසිය ඔවුනට වෙඩි තැබූ බව වාර්තා වේ. ගැටුම්කාරී තත්ත්වය වර්ධනය වෙමින් පවතින නිසා අතිරේක බලඇණි ප‍්‍රදේශයට ගෙන්වා ගැනීමට කටයුතු කළ බව ප‍්‍රාදේශීය පොලිස් ප‍්‍රධානියා ප‍්‍රකාශ කළේය. බෝඩෝ ගෝත‍්‍රිකයන් පිරිසක් මුස්ලිම් ශිෂ්‍ය නායකයන් දෙදෙනකු වෙඩිතබා ඝාතනය කිරීමෙන් අනතුරුව ඊට පළිගැනීමක් ලෙස මෙම ගැටුම්කාරී තත්ත්වය ඇතිවූ බව ඉන්දීය මාධ්‍ය වාර්තා සඳහන් කරයි. ප‍්‍රදේශයේ ආරක්ෂක සංවිධාන කටයුතු නිරීක්ෂණය කිරීම සඳහා ඉන්දීය ස්වදේශ කටයුතු අමාත්‍යාංශ නිලධාරීන් පිරිසක් ද පැමිණ සිටින බව වාර්තා වේ.ගැටුම් හේතුවෙන් පලායන සරණාගතයෝ...