ඇමෙරිකන් හමුදාව විසින් අත්අඩංගුවට ගනු ලැබීමෙන් පසු, අතුරුදන් වූ ඇෆ්ගන් ගම්වැසියන් නව දෙනකුගේ සිරුරු සොයා ගැනීමට හැකි වීමත් සමඟ, ඇෆ්ගන් වැසියෝ ඇමෙරිකන් හමුදාවට එරෙහිව ඊයේ (5) දැවැන්ත විරෝධතා රැලියක් පැවැත් අතර දහසකට වැඩි පිරිසක් ඊට එක් වූහ.
විරෝධතාකරුවන් කාබුල් අගනුවර තෙක් දිවෙන අධිවේගී මාර්ගයක් හරස් කරමින් එම විරෝධතාව පැවැත් වූ හෙයින් මාර්ගයේ ගමනාගමන කටයුතුවලට බාධා විය.

එම මළ සිරුරුවලින් හයක් හමු වූයේ මීට සතියකට පෙරය.

ඉතිරි මළ සිරුරු හමු වී ඇත්තේ පෙරේදා (4) උදෑසන නිරාක් නමැති දිස්ති‍්‍රක්කයේ ඇමෙරිකා හමුදා කඳවුරක් අසලදීය.
එම ගම්වැසියන් වධබන්ධනවලට ලක් කර මරා දමා ඇතැයි පරීක්ෂණවලින් අනාවරණය වූ බව නිරාක් ආණ්ඩුකාර අතයුල්ලා කොග්යානායි පවසා ඇත.
විරෝධතාකරුවන් ඇෆ්ගන් රජයට එක හඬින් කියා සිටියේ එම ගම්වැසියන් අත්අඩංගුවට ගත් ඇමෙරිකන් සෙබළුන් ගැන වහා සොයා බලා ඔවුන්ට දඬුවම් ලබා දීමට කටයුතු කරන ලෙසටය.

ඇෆ්ගන් ජනපති හමීඞ් කර්සායි මේ ගැන ඇමෙරිකා හමුදාවට දැනුම් දී ඇති අතර, ඇමෙරිකා හමුදාව පවසා ඇත්තේ ඒ ගැන විශේෂ පරීක්ෂණයක් පවත්වන බවය.

අහිංසක සිවිල් වැසියන් කිසිම අවස්ථාවක වධබන්ධනවලට ලක් නොකරන බව ද ඇමෙරිකන් හමුදාව යළිත් වරක් අවධාරණය කළේය.

මීට මාස කිහිපයකට පෙර ද මේ අයුරින් ඇමෙරිකානු හමුදා ඇෆ්ගන් සිවිල් වැසියන්ට අඩන්තේට්ටම් කරන බව වර්දාක් නමැති ප‍්‍රාන්තයෙන් වාර්තා විය.
වර්දාක් ප‍්‍රාන්ත වැසියන්ගෙන් එල්ල වූ විරෝධතා හමුවේ ඇෆ්ගන් ජනාධිපති හමීඞ් කර්සායි ඇමෙරිකන් හමුදාවට අණ කළේ වර්දාක් ප‍්‍රාන්තයෙන් වහා පිට වී යන ලෙසටය.

ඒ අනුව වර්දාක් ප‍්‍රාන්තයේ ඇමෙරිකන් හමුදා සැලකිය යුතු ප‍්‍රමාණයකින් අඩු කිරීමට කටයුතු කෙරුණි.

ඇමෙරිකන් හමුදාව ලබන වසරේ දී එනම් 2014 දී ඇෆ්ගන් සංග‍්‍රාමය අවසන් කර ඇෆ්ගනිස්තානයෙන් පිටව යෑමට නියමිතය. ඒ, රටේ ආරක්ෂාව ඇෆ්ගන් ආරක්ෂක අංශ වෙත පවරමිනි. ඒ සඳහා ඇෆ්ගන් ආරක්ෂක අංශ පුහුණු කිරීමේ කටයුතු මේ දිනවල සිදු වෙමින් පවතී.

සංග‍්‍රාම කටයුතු අවසන් වුවත් 2014 වසරෙන් පසු ඇමෙරිකන් හමුදා කඳවුරු කිහිපයක් ඇෆ්ගනිස්තානයේ දිගටම පවත්වා ගෙන යෑමට ඇමෙරිකාව තීරණය කර ඇත.

ඇමෙරිකාව එම තීරණය ගත්තේ ඇෆ්ගන් ජනපති හමීඞ් කර්සායි කළ ඉල්ලීමකට අනුවය.

ඇමෙරිකා හමුදා ඇෆ්ගනිස්තානයෙන් පිටවී ගියහොත් ඉරාකයේ සිදු වන්නාක් මෙන් ප‍්‍රචණ්ඩ කි‍්‍රයා ඇවිලේ යැයි ඇෆ්ගන් රජය බිය පළ කර ඇත. ඇමෙරිකා හමුදා කඳවුරු රටේ පවත්වා ගෙන යෑමට ඇෆ්ගන් රජය ඇමෙරිකාවට අවසර දී ඇත්තේ ඒ අනුවය.