පසුගිය කාලය පුරාම ඇමරිකාව උතුරු කොරියාව සමග සෘජු සබඳතා පවත්වාගෙන ගිය බව ඇමරිකානු රාජ්‍ය ලේකම් රෙක්ස් ටිලර්සන් මහතා ප්‍රකාශ කර ඇත.

ඇමරිකාවට උතුරු කොරියාව සමග සන්නිවේදන සබඳතා තිබෙන බවත් දෙරට අතර ඇත්තේ අඳුරු පරිසරයක් නොවන බවත් ඔහු ප්‍රකාශ කර ඇත.

ඇමරිකානු රාජ්‍ය ලේකම්වරයා මෙම අදහස් පළ කර ඇත්තේ චීන සංචාරයක යෙදෙන අතරතුරයි.

" ප්යොන්ග්යෑන් පාලනය සාකච්ඡා සඳහා ඇද ගැනීමට සහ ඇහුන්කන්දීම සඳහා යොමුකර ගැනීමට ඇති ඉඩකඩ පිළිබඳව වොෂින්ටනය මගක් සොයමින් සිටිනවා".යැයි ද ඒ මහතා පවසා ඇත.

කෙසේ වුවද මෙම සන්නිවේදන සබඳතා පැවැත්වීම ලෝකයටම රහසක් වූ අතර පසුගිය මාස කිහිපය පුරාම එක්සත් ජනපදය හා උතුරු කොරියාව අතර බරපතල වාග් සංග්‍රාම ඇති විය. ඇසෝසියේටඩ් ප්‍රෙස් මාධ්‍ය ආයතනය ද සඳහන් කර ඇත්තේ දෙපාර්ශවයම මාස කිහිපයක් තිස්සේ ප්‍රසිද්ධියකින් තොරව අදහස් හුවමාරු කරගෙන ඇති බවයි.  

මේ අතර ඇමරිකානු රාජ්‍ය ලේකම්වරයා සිය සංචාරයේදී චීන පාලනයේ ඉහල නිලධාරීන් සමග සාකච්ඡා කිරීමට බලාපොරොත්තුවන අතර එම සාකච්ඡාවන්හි දී උතුරු කොරියාවට එරෙහිව පනවා ඇති සම්බාධක ක්‍රියාවට නංවන මෙන් චීනයෙන් ඉල්ලා සිටිමට ද නියමිතව ඇත.

(බීබීසී පුවත් ඇසුරිණි - 085)