එක්සත් ජනපද ජනාධිපති ඩොනල්ඩ් ට්‍රම්ප් සහ උතුරු කොරියානු නායක කිම් ජොන්ග් උන් යන මහත්වරුන් අතර මේ මස අගදී පැවැත්වීමට නියමිත සාකච්ඡාවට සූදානම් වීම සඳහා උතුරු කොරියාව සම්බන්ධයෙන් පත් කර සිටින විශේෂ නියෝජිතයා උතුරු කොරියාවට ගිය බව ඇමෙරිකා රාජ්‍ය දෙපාර්තමේන්තුව සඳුඳා (4) නිවේදනය කළේය. 

 
ඇමෙරිකාවේ උතුරු කොරියානු විශේෂ නියෝජිතයා ලෙස පත් කර සිටින්නේ ස්ටීවන් බීයගන් ය. එක්සත් ජනපදය වෙනුවෙන් පත් කරන සිටින උතුරු කොරියාවේ විශේෂ නියෝජිතයා වන කිම් හ්යොක් චොල් සමඟ දෙරටේ නායකයන් අතර දෙවැනි සාකච්ඡාව පැවැත්විය යුතු ආකාරය සම්බන්ධයෙන් සාකච්ඡා පවත්වන බව ස්ටීවන් බියගන් පසුගිය සතියේදී පැවැසීය. 
 
එක්සත් ජනපද ජනාධිපති ට්‍රම්ප් සහ උතුරු කොරියානු නායක කිම් ජොන්ග් උන් අතර සාකච්ඡාව අර්ථාන්විත සහ පලදායී එකක් බවට පත් කිරීමත් සාකච්ඡාවේ අරමුණු ඉටු කරගැනීමත් සඳහාත් එක්ව වැඩ කරන බව ද හෙතෙම කීවේය. 
 
ඇමෙරිකානු ජනාධිපතිවරයා සහ උතුරු කොරියානු නායකයා අතර ඓතිහාසික සාකච්ඡාවක් පසුගිය වසරේ ජූනි මාසයේදී සිංගප්පූරුවේදී පැවැත්විණි. ධුරයේ සිටින එක්සත් ජනපද ජනාධිපතිවරයකු- සහ උතුරු කොරියානු නායකයකු අතර සාකච්ඡාවක් පැවැත්වුණු පළමු අවස්ථාව එය විය. කොරියානු අර්ධද්වීපය න්‍යෂ්ටික අවිවලින් තොර කලාපයක් බවට පත් කිරීම එම සාකච්ඡාවේ ප්‍රමුඛතම අරමුණ විය. 
 
ස්ටීවන් බීයගන් උතුරු කොරියානු නියෝජිතයා අතර සාකච්ඡා අද (5) පැවැත්වීමට නියමිත අතර හෙතෙම ඊයේ (4) සහ (3) දකුණු කොරියානු නියෝජිතයන් සමඟ සාකච්ඡා පැවැත්වීය. 
 
 
රොයිටර් ඇසුරිනි
 
055