දිනකට ඇපල් ගෙඩියක් සිය ආහාරයට එක්කැර ගැනීමෙන් වයස අවුරුද 50 ඉක්මවූවන්ට හෘදයාබාධ හා අඝාතය වැළඳීමේ අවධානමෙන් වැළකිය හැකියැයි ඔක්ස්ෆර්ඩ් සරසවියේ පර්යේෂකයන් පිරිසක් පෙන්වාදෙති. ඔවුන් පවසන්නේ ඉංග්‍රීසි කියමනක් වන ''දිකට ඇපල් ගෙඩියක් කෑම වෛද්‍යවරයා තමන් වෙතින් ඈත්කැර තැබීමට හැකියි" යන්න සත්‍යයක් බවයි.

ඔක්ස්ෆර්ඩ් සරසවියේ  බ්‍රිතාන්‍ය හෘද පදනමේ සෞඛ්‍ය ප්‍රවර්ධන පර්යේෂණ කණ්ඩායමේ වෛද්‍ය ඇඩමි බ්‍රිජ් පවසන්නේ ඇපල් ගෙඩියක් අනුභවයට ගැනීම වැනි සරළ වෙනසක් ආහාරවේලට එක්කර ගැනීම මගින් හෘද රෝග සහ ආඝාත තත්වයන්ගෙන් වැළකී සිටිය හැකි බවයි.

බ්‍රිතාන්‍ය වෛද්‍ය සගරාවේ නවතම මුද්‍රණයයෙන් මේ පර්යේෂණය පිළිබඳ තොරතුරු ඉදිරිපත් කැර ඇත. ඔවුන් පවසන්නේ හෘද රෝග සහ අඝාතයෙන් බේරී සිටීමට ලක්ෂ 176 ක පමණ පිරිසක් ක්ෂණික බෙහෙත් සිය සන්තකයේ තබාගන්නා බවයි. දිනකට ඇපල් ගෙඩියකින් තුනෙන් එකක් ආහාරයට එක්කැර ගැනීමෙන් ඒ ක්ෂණික ඖෂධ වලින් වැළකී සිටිය හැකි බව ද පර්යේෂකයෝ පෙන්වාදෙති. ක්ෂණික ප්‍රතිකාර ඖෂධ මගින් අතුරු අබාධ රාශියක් ඇතිවේ. එනම් මාංශ පේෂි ආබාධ සහ රෝග මෙන්ම දියවැඩියාවට ගොදුරු වීම ද සිදුවේ.

හෘදයාබාද වැළඳීමෙන් බ්‍රිතාන්‍යයේ වාර්ෂිකව මියයන සංඛයාව 9400කි. ඇපල් ගෙඩියක් ආහාරයට ගැනීමෙන් එවැනි හෘදයාබාද ඇතිවීම සියයට 70න් පහළ දැමිය හැකි බව ද සොයාගෙන ඇත.