ආයුධ බිම දමා සටන් අත්හැරියොත්, ඇෆ්ගන් තලේබාන් සටන්කාමීන්ට මුදල් ලබා දීමට බි‍්‍රතාන්‍ය රජය සූදානම් වන බව ”ද එක්ස්ප්‍රෙස්” පුවත් සේවය ඊයේ (3) අනාවරණය කළේය.
ඇෆ්ගන් සංග‍්‍රාමය ලබන වසරේ දී එනම් 2014 දී නිමා කිරීමට ඇමෙරිකාව, බි‍්‍රතාන්‍ය ඇතුළු නේටෝව බලාපොරොත්තු වන අතර සටන් අත්හරින්නේ නම්, එම අල්ලස් මුදල ලබා දීමට කටයුතු කරන බව එම පුවත්පත වැඩි දුරටත් කියා සිටී.
වසරක කාලයක් සඳහා මාසිකව තලේබාන් සංවිධානයට බි‍්‍රතාන්‍ය පවුම් 100 ක (ඇමෙරිකන් ඩොලර් 152) මුදලක් ලබා දීමට බි‍්‍රතාන්‍ය බලධාරීහු තීරණය කර ඇති බවත් ඒ සඳහා නේටෝවේ ද සහාය හිමිවන බවත් ‘ද එක්ස්ප්‍රෙස්’ පුවත්පත වැඩි දුරටත් කියා සිටී. එම කටයුත්තේ දී නේටෝව ද පවුම් බිලියන 6.6 ක මුදලක් වෙන් කර ඇතැයි ද වාර්තා වේ.
මේවනවිට බි‍්‍රතාන්‍ය සෙබළුන් 8,000 ක් ඇෆ්ගනිස්තානයේ සංග‍්‍රාමවල නියැළී සිටින අතර මේ වසර අවසන් වෙද්දී එය 5,200 තෙක් අඩු කිරීමට බි‍්‍රතාන්‍ය රජය සූදානම් වේ. සෙසු පිරිස ලබන වසරේ දී ඉවත් කර ගැනීමට නියමිතය.
ඇමෙරිකා හමුදාව ප‍්‍රමුඛ නේටෝව, ඇෆ්ගනිස්තානය ආක‍්‍රමාණය කළේ 2001 වසරේ දීය. ඒ, තලේබාන් පාලනය පෙරළා දමමිනි. ඉන්පසු තලේබාන් සංවිධානය අවි අතට ගෙන සටන් ඇරැඹූ අතර, අද වන තෙක්ම ඔවුන් පරාජය කිරීමට විදෙස් හමුදාවට හැකි වී නැත.
ඇෆ්ගනිස්තානයේ හමීඞ් කර්සායිගේ රජය පිහිටුවීමට කටයුතු සැලැසුම් කර දුන්නේ ද ඇමෙරිකාව සහ බි‍්‍රතාන්‍යය ප‍්‍රමුඛ බටහිර රටවල්ය. ඇෆ්ගන් රජය පවත්වාගෙන යෑමට බටහිර රටවලින් ආධාර මුදල් ද ලබා දෙයි.
2014 වසරේ දී සංග‍්‍රාම මෙහෙයුම් අවසන් කර, විදෙස් හමුදා පිටවී ගියහොත්, ඉරාකයේ සිදුවන්නාක් මෙන් ප‍්‍රචණ්ඩ කි‍්‍රයා ඇවිලේවි යැයි ඇෆ්ගන් ජනපති ප‍්‍රමුඛ රජය බිය පළ කර තිබේ.
ඇෆ්ගන් රජයේ ඉල්ලීම මත ඇමෙරිකන් හමුදා කඳවුරු කිහිපයක් 2014 වසරෙන් පසුවත් පවත්වාගෙන යෑමට ඇමෙරිකාව පසුගියදා කැමැත්ත පළ කළේය. ඇමෙරිකා හමුදා එම කඳවුරු පවත්වාගෙන යනු ඇත්තේ ඇෆ්ගන් රජයේ කොන්දේසිවලට අනුවය.