මියන්මාර හමුදා රජයට එරෙහිව වසර 25 කට අධික කාලයක් ප‍්‍රජාතන්ත‍්‍රවාදය ස්ථාපිත කිරීම සඳහා අහිංසාවාදී අරගලයක් ගෙන ගිය එරට ප‍්‍රජාතන්ත‍්‍ර නායිකා අවුන් සාන් සූ කී, ඊයේ (2) ප‍්‍රථම වරට පාර්ලිමේන්තු මන්තී‍්‍රවරියක ලෙස දිවුරුම් දුන්නාය. ඇයට පාර්ලිමේන්තුවේ අසුන් ගැනීමට අවස්ථාව උදා වූයේ පසුගිය අපේ‍්‍රල් පළමුවැනි දා පැවැති අතුරු මැතිවරණයෙන් ඇය ජයග‍්‍රහණය කළ හෙයිනි. සූ කී සමඟ පාර්ලිමේන්තුවේ පහළ මන්ත‍්‍රණ සභාවට තේරුණු ඇගේ ජාතික ප‍්‍රජාතන්ත‍්‍රවාදී පක්ෂයේ සාමාජිකයෝ 33 දෙනෙක් ද දිවුරුම් දුන්හ. පසුගිය 23 වැනිදා මියන්මාර පාර්ලිමේන්තුව රැස්වූ අවස්ථාවේදී සූ කී සහ ඇගේ පක්ෂයේ මන්තී‍්‍රවරුත් එය වර්ජනය කළහ. මන්තී‍්‍රවරුන් පාර්ලිමේන්තුවේ අසුන් ගැනීමේ දී හමුදාවට පක්ෂපාතී බව අඟවමින් දිවුරුම් දිය යුතුව ඇත. සූ කී සහ ඇගේ පක්ෂයේ මන්තී‍්‍රවරුන් කියා සිටියේ එම දිවුරුම් ප‍්‍රකාශයට ඇතුළත් වගන්ති කිහිපයක් වෙනස් කරනතුරු පාර්ලිමේන්තුව වර්ජනය කරන බවය. හමුදා පාලකයන්ගේ රූකඩයක් වූ මියන්මාර සිවිල් රජය යටතේ කටයුතු කිරීමට හෝ දිවුරුම් දීමට තමන් කිසිසේත් සූදානම් නැති බව ඔවුහු අවධාරණය කළහ. කෙසේ නමුත් පසුගිය 29 වැනිදා මියන්මාරයට පැමිණි එක්සත් ජාතීන්ගේ මහ ලේකම් හමුවීමෙන් පසු සූ කී කියා සිටියේ තමා පාර්ලිමේන්තුවේ අසුන් ගන්න බවය. ඇගේ පක්ෂය ද කියා සිටියේ මියන්මාර ව්‍යවස්ථාවේ සංශෝධන ඇති කිරීමට නම් අකමැත්තෙන් වුව ද පාර්ලිමේන්තුවට යා යුතු බවයි. මියන්මාරයට ප‍්‍රජාතන්ත‍්‍රවාදය උදා කරදීමේ අරමුණින් අහිංසාවාදී අරගලයක් ගෙන යමින් ඒ වෙනුවෙන් සිය ජීවිත කාලයම කැප කළ සූ කී පාර්ලිමේන්තු මන්තී‍්‍රවරියක ලෙස දිවුරුම් දීම නව යුගයක ආරම්භයක් බව එක්සත් ජාතීන්ගේ මහ ලේකම්වරයා පවසයි.