නාවිකයන් 44දෙනකු සමඟ පසුගිය බදාදා (15) අතුරුදන් වූ ආජන්ටිනාවට අයත් සබ්මැරීනයේ කාර්මික දෝශයක් හටගෙන ඇති බවත් එයින් නිකුත් වූ අවසාන පණිවුඩයේ සඳහන් වූයේ යැයි ආජන්ටිනා නාවික හමුදාව පවසයි. 
 
මෙම සබ්මැරීනය ආජන්ටිනාවට අයත් මුහුදේ කිලෝමීටර් 430 ක් පමණ දුරින් යාත්‍රා කරමින් සිටියදී ගොඩබිම සමඟ පැවති සබඳතා බිඳවැටුණු බව වාර්තා විය. 
 
සොනොර් උපකරණ යොදාගෙන දින හයක් තිස්සේ දකුණු අත්ලාන්තික් සාගරය පීරමින් මෙහෙයුම් සිදු කළද මෙතෙක් යාත්‍රාව සම්බන්ධ කිසිම තොරතුරක් සොයාගැනීමට නොහැකි වූ බව මාධ්‍ය වාර්තා කර තිබිණි.  
 
මුහුද යට මෙහෙයුම් සිදු කරන විශේෂ කණ්ඩායමක් ඇමෙරිකාවෙන් ගෙන්වාගෙන තිබුණු අතර බෝට්ටු සහ ගුවන් යානා ද මෙහෙයුමට සම්බන්ධ විය. සෝනාර් උපකරණ වලට දැනුණු ශබ්ද සබ්මැරීනයෙන් නිකුත් වූ ඒවා නොවන බව පසුව වාර්තා විය.
 
සබ්මැරීනය ආජන්ටිනාවේ උශුරා නාවික කඳවුරේ සිට උතුරින් පිහිටි මාඩෙල් පෙටා කඳවුර වෙත යාත්‍රා කිරීමට නියමිතව තිබිණි.
 
1983 වර්ෂයේ ජර්මනියේ නිපදවා ඇති මෙම යාත්‍රාව දිගින් මීටර් 66ක් පමණ වන අතර පැයට කිලෝමීටර් 45ක වේගයෙන් ධාවනය කළහැකිය.
 
(බීබීසී ඇසුරිණි - 085)