පුරපතිනියගෙන් චෝදනා  

(නිශාන්ත කුමාර බණ්ඩාර)  

කොළඹ නගරයේ හුදකලා කර ඇති ප්‍රදේශවල ජනතාවට ප්‍රමාණවත් තරම් සහනාධාර ලැබී නැතැයි කොළඹ නගරාධිපතිනී රෝසි සේනානායක මහත්මිය පවසන්නීය.

අඩු ආද‌ායම්ලාභී ජනතාව 1,50,000 ක් පමණ සිටින බවට හඳුනාගෙන ඇති අතර රජය මගින් ලබා දුන් රුපියල් 10,000 ක බඩු මල්ල සියලු ජනතාවට ලැබී නැතැයි ද ඇය සඳහන් කළාය.  

කොළඹ නගරය තුළ ප්‍රදේශ කිහිපයක් සීමා කර ඇති නිසා ඔවුන්ගේ දෛනික කටයුතු ඇනහිට තිබේ.  
ඒ පිළිබඳ තමන් හදවතින්ම කනගාටු වෙන අතර කඩිනමින් එම ප්‍රදේශ හුදකලා තත්ත්වයෙන් මුද‌ාහැරීමට කටයුතු කරන ලෙස රජයෙන් ඉල්ලීමක් කරන බව ද ඇය පැවැසුවාය.  

හුදකලා කර ඇති ප්‍රදේශවල ජනතාවට නගර සභාවේ මැදිහත්වීම මත රුපියල් 3000 ක සහනාධාර බඩුමල්ලක් ලබා දීමට පියවර ගෙන තිබේ.  

එහෙත් ප්‍රමාණවත් මුදල් ප්‍රතිපාදන නොමැති නිසා පරිත්‍යාග ශීලීන්ගෙන් හා පෞද්ගලික ආයතනවලින් ජනතාවට සහන සලසන ලෙස ද ඉල්ලීමක් කරන බව ද කොළඹ නගරාධිපතිනී රෝසි සේනානායක මහත්මිය සඳහන් කළාය.