(අජන්ත කුමාර අගලකඩ)  

කටුනායක ජාත්‍යන්තර ගුවන්තොටුපොළ විදේශීය සංචාරකයන්ට ලබන අගෝස්තු මස 1 වැනිදා සිට යළි විවෘත කිරීමට කලින් සැලසුම් කර තිබුණ ද එය තවදුරටත් කල් යනු ඇතැයි රජයේ ආරංචිමාර්ග සඳහන් කරයි.  

මෙරටට ඒමට සූදානමින් සිටින විදේශගත ශ්‍රී ලාංකිකයන් ලබන අගෝස්තු 1 වැනිදා වනවිට ගෙන්වා අවසන් කිරීමට නොහැකි වීම නිසා ගුවන් තොටුපළ සංචාරකයන්ට විවෘත කිරීම මෙසේ කල්යනු ඇතැයි වාර්තා වේ.  


විදේශගත ශ්‍රී ලාංකිකයන් මෙරටට ගෙන්වීමේදී කටුනායක ගුවන්තොටු පොළේදීම පී.සී.ආර්. පරීක්ෂණයට ලක් කෙරෙන බැවින් දැනට තිබෙන පහසුකම් අනුව දිනකට මෙහෙයුම් සිදුකළ හැක්කේ ගුවන් යානා තුනක් පමණක් බව සංචාරක ගුවන් සේවා හා ආයෝජන ප්‍රවර්ධන අමාත්‍යාංශයේ උසස් නිලධාරියෙක් ඉරිදා ලංකාදීපයට පැවැසීය.  


විදේශගත ශ්‍රී ලාංකිකයන් 52,401 දෙනකු පමණ මෙරටට ඒමට සූදානමින් සිටින බවත් දැනටමත් ගෙන්වා ගෙන ඇත්තේ 12,000 ක පමණ පිරිසක් බවත් ඔහු සඳහන් කළේය.  
මේ අතර ගුවන් තොටුපළ විවෘත කිරීම හා සංචාරකයන්ට රට විවෘත කිරීම සම්බන්ධයෙන් සෞඛ්‍ය නිර්දේශ සකස් කිරීම සඳහා සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා විසින් තාක්ෂණික කමිටුවක් පත්කරනු ලැබ ඇතැයි වාර්තාවේ.  


සෞඛ්‍ය අමාත්‍යාංශයේ විශේෂඥ වෛද්‍යවරුන් හා ශ්‍රීලංකන් ගුවන් සමාගම, ගුවන් තොටුපළ අධිකාරිය, සිවිල් ගුවන් සේවා අධිකාරිය, සංචාරක මණ්ඩලය යන ආයතනවල නිලධාරීන් ද එම කමිටුවට ඇතුළත්ව සිටින බව දැනගන්නට ඇත.

  
තාක්ෂණික කමිටුව එම වාර්තාව සකස් කර සෞඛ්‍ය සේවා අධ්‍යක්ෂ ජනරාල්වරයාට ඉදිරිපත් කිරීමෙන් අනතුරුව ඔහු එය ජනාධිපතිවරයාට බාරදීමට නියමිතය.