ආනයනකරුවෝ කියති 

 (මහින්ද නිශ්ශංක)   

 ​ඩොලර් හිඟය හේතුවෙන් අත්‍යවශ්‍ය ආහාර ද්‍රව්‍ය අඩංගු කන්ටේනර් 1500කට වැඩි ප්‍රමාණයක් මේ වන විට නිදහස් කර ගැනීමට නොහැකිව කොළඹ වරායේ ගොඩගැසී ඇති නිසා එළඹෙන උත්සව සමයේදී පිටකොටුව තොග වෙ​ෙළඳ මධ්‍යස්ථානයේ අත්‍යවශ්‍ය ආහාර ද්‍රව්‍යවල හිඟයක් ඇතිවිය හැකි බව එම ආනයනකරුවෝ සඳහන් කරති.   

විශේෂයෙන් එම කන්ටේනර් නිදහස් කර ගැනීමට අදාළ ලියකියවිලි වාණිජ බැංකු මගින් මුදා නොහැරීම නිසා මෙම කන්ටේනර් නිදහස් කර ගැනීමට නොහැකි වී ඇති බව ඔවුහු කියා සිටිති.   

 මෙම කන්ටේනර්වල අර්තාපල්, බී ළුෑනු, මිරිස්, පරිප්පු, කඩල, කරවල වර්ග, කුළුබඩු වර්ග ඇතුළු ආහාර ද්‍රව්‍ය රැසක් අඩංගුව පවතින බව සඳහන් කරන ආනයනකරුවෝ මෙම භාණ්ඩවල ඩොලර් මිලියන 150ත් 200ත් අතර වටිනාකමක් පවතින බවද කීහ.   

 මෙම භාණ්ඩ කන්ටේනර් නිදහස් කර දෙන මෙන් ඔවුහු මුදල් ඇමැතිවරයා ප්‍රමුඛ රජයෙන් ඉල්ලා සිටිති.   
 කන්ටේනර් නිදහස් කර ගැනීම ප්‍රමාද වීම හේතුවෙන් වරායට ප්‍රමාද ගාස්තු ගෙවීමට සිදුවී ඇති බවත් දින 21 කට වැඩි කාලයක් තුළ කන්ටේනර් නිදහස් කර නොගැනීමෙන් වෙන්දේසි කරන බවත් වරාය අධිකාරිය මගින් ආනයනකරුවන් බොහෝ දෙනෙකුට ලිපි මගින් දැනුම් දී ඇති බවත් ඔවුහු සඳහන් කරති.