(දිලීප් ජයසේකර)

කොහොඹ කඳන් අටක් මෝලකට විකීණිමට රැගෙන යමින් සිටි සැකකරුවෙකු සෙවනගල ඇඹිලිපිටිය මාර්ගයේ මොරකැටිය හංදියේදී සූරියවැව පොලිස් විශේෂ කාර්ය බලකා කඳවුරේ නිලධාරීන් අද (11) අත්අඩංගුවට ගෙන තිබේ.

සැකකරු සෙවනගල කිරිඉබ්බන්ආර ප්‍රදේශයේ සිට මොරකැටියේ පිහිටි ලී මෝලකට  විකිණිමට කොහොඹ කඳන් රැගෙන යමින් සිටියදී මෙලෙස අත්අඩංගුවට පත්ව තිබේ.

සැකකරු සෙවනගල හා ඒ අවට ඇති ගස් හොර රහසේ කපා ලී මෝල්වලට විකිණීමේ ජාවාරමක නිරත වන්නේද යන්න පිළිබඳව වැඩිදුර පරීක්ෂණ ආරම්භ කර ඇති බව පොලිසිය කීය.

සැකකරු සම්බන්ධයෙන් පොලිස් විශේෂ කාර්ය බලකා නිලධාරීන්ට ලැබුණු තොරතුරකට අනුව වැටලීම කර තිබේ.

සැකකරු සෙවනගල කිරිඉබ්බන්ආර ප්‍රදේශයේ පදිංචි 41 හැවිරිදි පුද්ගලයෙකි.

කොටන් පැටවූ කුඩා ලොරි රථය, කොටන් තොගය හා සැකකරු වැඩිදුර විමර්ෂණ සඳහා තණමල්විල අඩවි වන කාර්යාලයට බාරදී තිබේ.

සැකකරු ඇඹිළිපිටිය මහේස්ත්‍රාත් අධිකරණයට ඉදිරිපත් කිරීමට නියමිතය.