ලොකු ලූනු ගොවියා කබලෙන් ලිපට

(කාංචන කුමාර ආරියදාස)
 
 
දඹුල්ල ආර්ථික මධ්‍යස්ථානයේ මේ දිනවල ඉන්දියාවෙන් ගෙන්වන ලද  ලොකු ලූනු  විශාල වශයෙන් අලෙවි කිරීම  හේතුවෙන් දඹුල්ල ගලේවෙල සීගිරිය ආදී බල ප්‍රදේශවල ගොවීන්ට තම අස්වැන්න අලෙවි කරගැනීමට නොහැකිව ගොවිපලවල ගබඩාවල නරක් වී තිබී ඉවත් කිරීමට සිදුව ඇතැයි ගොවීහු පෙන්වා දෙති.

මේ දිනවල විදේශීය  ලොකු ලූනු කිලෝවක් රුපියල් 80ක් 85ක් අතර මිලකට අලෙවි කරන බවත් දේශීය ලොකු ලූනු කිලෝවක් රුපියල් 60 ත්  65 ත් අතර මිලක් පැවතිය ද දේශීය ලොකු ලූනු මිලදී ගැනීමක් ව්‍යාපාරිකයන් සිදු නොකිරීම හේතුවෙන් මේ තත්ත්වය උදා වී තිබෙන බවත් ගලේවෙල පට්ටිවෙල ප්‍රදේශයේ මහා පරිමාණ ලොකු ලූනු ගොවියකු වූ එස්.ඒ. රත්නපාල මහතා පැවසීය.

ලොකු ලූනූ වගාකරුවකු රතනපාල මහතා කියා සිටියේ තමන් ලූනු අක්කර 30ක වගා කළ බවයි. මේ  වන විට ලූනු කිලෝ හැත්තෑපන්දහසකට අධික ප්‍රමාණයක් අලෙවි කර ගැනීමට නොහැකිව ඉවත් කළ බවත් තවමත් තමන්ගේ ගබඩාවල විශාල වශයෙන් දේශීය ලොකු ලුනූ ගොඩගසා දිනපතාම ඒවා නරක් වෙන ඒවා ඉවත් කරමින් විශාල මුදලක් වියදම් කරමින් සිටින බවයි.

විදේශ රටවලින් ගෙන්වන ලොකු ලූනු සඳහා රුපියල් 40ක විශේෂ බද්දක් රජය පැනවුව ද එම බදු මුදල් ගෙවා දඹුල්ල වෙළඳපොළේ ඉන්දියාවෙන් ගෙන්වන ලද ලොකු ලූනු අඩු මුදලට අලෙවි කිරීම මෙම ගැටළුවට හේතුවී ඇතැයි ගොවීහු වැඩිදුරටත් පවසති.