(එම් .සුසිල් ප්‍රියන්ත සහ සුමතිපාල  දියගහගේ )


අහුංගල්ල ප්‍රදේශයේ විහාරස්ථානයක චිවරධාරියෙකු ලෙස පෙනී සිටිමින් තරුණයින්ට කැනඩාවේ රැකියා ලබාදෙන බව පවසා  රුපියල් කෝටි හතරක් පමණ වංචා සහගත ලෙස ලබාගෙන  ප්‍රදේශයෙන් පලාගොස් සැගව සිටි අයෙකු පෙරේදා (11 )මාරවිල සංචාර හෝටලයකදී අත්අඩංගුවට ගත් බව පොලීසිය පවසයි.


 ඔහු විසින් වංචා සහගත ලෙස ලබාගන්නා ලදැයි කියන රුපියල් එක්කෝටි අට ලක්ෂ විසිදහසක මුදල් ,ලක්ෂ පහක පමණ රන් ආභරණ , ලක්ෂ හැත්තාවක් පමණ වටිනා ජීප් රථයක් හා ,ජංගම දුරකථන පහක් ද ඔහු  සමඟ  පොලිස් බාරයට ගෙන තිබේ. 


සැකකරු අත්අඩංගුවට පත්වන අවස්ථාවේදී ඇද සිටි චිවරය ඉවත්කොට කලිසමකින් හා කමිසයකින් මාරවිල හෝටලයක සිටි බවත් තමන් එම හෝටලය වටලන අවස්ථාවේ ඔහු මත්පැන් පානය කරමින් සිට බවත් පසු දින කැනඩා බලා පිටත් වීමට සියලු කටයුතු සුදානම් කර ගෙන  තිබු බවත් පොලිසිය සඳහන් කළේය.


      කැනඩාවේ විශ්වවිද්‍යාලයක  මහාචාර්යවරයකු ලෙස  සේවය කර ඇති තමාට පහසුවෙන්ම ඒ රටේ රැකියාවන් ලබාදිය හැකි බව පවසමින් සැකකරුරැදී  සිටි අහුන්ගල්ල විහාරස්ථානය හා ඒ අවට තරුණයින් රවටා එක් අයෙකුගෙන් රුපියල් ලක්ෂ දෙකේ සිට රුපියල් ලක්ෂ පහ දක්වා වංචා සහගත ලෙස ලබාගෙන ඇති බවත් මේ සම්බන්ධයෙන් අහුන්ගල්ල පොලිස් බල ප්‍රදේශයෙන් පමණක් පැමිණිලි 18ක් හා ඇල්පිටිය පොලිස් බල ප්‍රදේශයෙන් පැමිණිලි 9ක් තිබෙන බවත් මේ ආකාරයට සැකකරු රුපියල් ලක්ස හාරසියයක් පමණ මුළු ලංකාව වටේම තරුණයින්ගෙන් එකතුකරගෙන ඇති බවත් පරීක්ෂණවලදී හෙළිවූ බවත් පොලිසිය කියයි .