(චන්ද්‍රසේන ගමගේ)

මින් පසු මේ රටේ දූෂිත දේශපාලඥයන්ට දේශපාලන භූමියේ ඉඩක් නැති බවත් ඉතිහාසයේ පළමු වතාවට දූෂිත දේශපාලඥයන් හෙළිදරවු කිරීමට ජනාධිපති මෛත්‍රීපාල සිරිසේන මහතා පියවර ගත් බවත් ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතා අද(7) වීරකැටිය බෝගමුව වෙහෙරගොඩ බෞද්ධ මධ්‍යස්ථානයේ පැවති ආගමික උත්සවයකදී පැවසීය.
‘‘බැඳුම්කර වංචාව සම්බන්ධයෙන් විමර්ශනය කිරීම සදහා පත් කළ ජනාධිපති විමර්ශන කොමිසමේ දී බොහෝ කරුණු එළිදරවු වෙමින් පවතින බවයි. ආණ්ඩුවේ යම් යම් අයට මේ වන විට චෝදනා එල්ල වෙනවා. ඉදිරි දින කිහිපයේ හොද හොද ප්‍රවෘත්ති ඇති වෙයි. ඉතිහාසයේ කවදාවත් නොවූ විදියට මේ ආණ්ඩුවේ ඇමතිවරයෙක් වු තිලක් මාරපන මහතාට ඉල්ලා අස් වෙන්න සිදු වුණා. රවි කරුණානායක ඇමැතිවරයාට චෝදනා එල්ල වී තිබෙනවා. ඔහු මේ වෙලාවේ කළ යුතු වන්නේ ඇමති ධූරයෙන් ඉල්ලා අස්වී තම ගෞරවය වගේම ආණ්ඩුවේ ගෞරවයත් රැකීමයි. විමර්ශනවලින් අනතුරුව ඔහු නිවැරදි නම් දේශපාලන කටයුතු කරන්න කිසිම බාධාවක් වෙන්නේ නැහැ‘‘ යැයි ද අමරවීර මහතා කීය.