(නාලක සංජීව දහනායක)

පසුගිය රජය මුද්‍රණය කර ඇති පහ ශ්‍රේණියේ ඉංග්‍රීසි පෙළ පොතේ පළාත් හඳුන්වාදීමේදී උතුරු හා නැගෙනහිර පළාත් වෙන් නොකොට එකම වර්ණයකින් වර්ණ ගන්වා තිබෙන බව ජාතික උරුමයන් සුරැකීමේ මහා සම්මේලනයේ කැඳවුම්කරු ජානක බෝධිනන්ද ගුණතිලක මහතා අද (25) පැවැසීය.

මේ ආකාරයට උතුරු හා නැගෙනහිර පළාත් එකම වර්ණයකින් වර්ණ ගන්වා හඳුන්වා තිබීම අනාගතයේදී රට විනාශ කිරීමේ මූලාරම්භය විය හැකි බවටද ඔහු චෝදනා කළේය.

කොළඹදී අද (25) පැවැති මාධ්‍ය හමුවකට එක්වෙමින් ඔහු සඳහන් කර සිටියේ එම පෙළ පොතෙහි උතුරුමැද පළාතේ ළමයකු පාපන්දුවක් පාගාගෙන සිටින ආකාරයේ සිතුවමක් ඇතුළත් කර තිබෙන බවත් එමගින් දරුවාට රට පිළිබඳව අභිමානයක් ඇති නොවන බවත්ය.

උතුරුමැද පළාත හඳුන්වාදීමට එම ප‍්‍රදේශයේ ඓතිහාසික සිද්ධස්ථානයක ඡායාරූපයක් ඇතුළත් කළ යුතු බවත් ඔහු කිය.

මෙරට ජාතික උත්සව පිළිබඳව හඳුන්වාදීමේදී සිංහල හා හින්දු අලුත් අවුරුද්ද පිළිබඳව කිසිවක් ඇතුළත් කර නැති බවත් එය හිතා මතාම කළ බරපතළ වැරැද්දක් බවත් ඔහු චෝදනා කළේය.

රටේ ඓතිහාසික උරුමය විකෘති කරමින්, පළාත් පිළිබඳව වැරදි අවබෝධයක් ලබාදෙමින් පසුගිය ආණ්ඩුව මුද්‍රණය කර ඇති මෙම පහ ශ්‍රේණියේ ඉංග්‍රීසි පෙළ පොත අධ්‍යයනය කරන මෙන් වත්මන් ආණ්ඩුවෙන් ඉල්ලා සිටින බවත් ජාතික උරුමයන් සුරැකීමේ මහා සම්මේලනය සඳහන් කළේය.