(නිමන්ති රණසිංහ)

අන්තර්ජාලය ඔස්සේ අළෙවි වූ බාලවයස්කාර දැරිය අපයෝජනය කිරීමේ සිද්ධියට අදාළ වින්දිත දැරිය, කුට්ටනය කිරීම සම්බන්ධයෙන් රක්ෂිත බන්ධනාගාර ගත කර සිටින ගල්කිස්ස ප‍්‍රදේශයේ ප‍්‍රසිද්ධ හෝටලයක කළමණාකරුවකු හා තැරැව්කාර තිරෝද රථ රියැදුරෙකු අතර සිදුවූ බව කියන දුරකතන සංවාද කිහිපයකට අදාළ විශ්ලේෂණ වාර්තා අධිකරණයට ලබා දෙන ලෙස කොළඹ අතිරේක මහේස්ත‍්‍රාත් ලෝචනී අබේවික‍්‍රම මහත්මිය ළමා හා කාන්තා කාර්යාංශයට අද (12) නියෝග කළාය.

මෙම සිද්ධියට අදාළ දෙවැනි සැකකාර හෝටල් කළමනාකාරවරයා සහ අදාළ තී‍්‍රරෝද රථ රියැදුරා අතර සිදුව ඇති මෙම දුරකතන සංවාදයන් සම්බන්ධයෙන් අත්අඩංගුවට ගෙන ඇති ජංගම දුරකතන ඔස්සේ පරීක්ෂා කර වාර්තාවක් ලබා දෙන ලෙසට රජයේ රස පරීක්ෂකවරයාට නියෝගය කරන්නැයි ළමා හා කාන්තා කාර්යාංශය කළ ඉල්ලීමක් සැලකිල්ලට ගත් මහේස්ත‍්‍රාත්වරිය මෙම නියෝගය නිකුත් කළාය.

ළමා හා කාන්තා කාර්යාංශය අද (12) මෝසමක් ගොනු කරමින් අදාළ නියෝගය ලබා දෙන ලෙසට අධිකරණයෙන් ඉල්ලීමක් කළ අවස්ථාවේදී මෙම කරුණු ඉදිරිපත් විණී.

මෙම සිද්ධියට අදාළව මොරටුව මහේස්ත‍්‍රාත් අධිකරණයේ විභාග වෙමින් පවතින නඩුවට අදාළව ඇප මත සිටින එහි දෙවැනි සැකකරු පි‍්‍රයංග නලින් කුලරත්න නමැත්තා  සහ මෙම නඩුවේ දෙවැනි සැකකරු වන හෝටල් කළමණාකරුවකු වන චන්දන බණ්ඩාර යන අය අතර පැවැති  දැරිය කුට්ටනය කිරීමට අදාළ දුරකතන සංවාද කිහිපයක පිටපත් ළමා හා කාන්තා කාර්යාංශය අධිකරණයට ඉදිරිපත් කර තිබිණී.

මෙම සිද්ධියට අදාළව මේ වන විට සැකකරුවන් 29 දෙනකු අත් අඩංගුවට ගෙන ඇති බව ළමා හා කාන්තා කාර්යාංශය අධිකරණයට දැනුම් දී ඇත.

මෙම සිද්ධිය සම්බන්ධයෙන් රක්ෂිත බන්ධනාගාර ගත කර සිටි මිහින්තලය ප‍්‍රාදේශීය සභාවේ උප සභාපතිවරයා, වැලිසර නාවික හමුදා රෝහලේ වෛද්‍යවරයා, මැණීක් ව්‍යාපාරිකයා සිද්ධියට අදාළව වින්දිත දැරියගේ මව, කැළණීය ප‍්‍රදේශයේ විහාරස්ථානයක හිමිනමක, ප‍්‍රසිද්ධ ව්‍යාපාරිකයකු ඇතුළු සැකකරුවන් 10 දෙනකු අධිකරණයෙන් ඇප මත මුදා හැර ඇත.

පොලිස් ක්‍රීඩා කොට්ඨාසයේ උප පොලිස් පරීක්ෂකවරයකු, රජයේ ප‍්‍රධාන පෙළේ බැංකුවක හිටපු කළමණාකාරවරයකු, මාලදිවයිනේ හිටපු මුදල් රාජ්‍ය අමාත්‍යවරයකු, පොලිස් විශේෂ කාර්ය බලකායේ පොලිස් කොස්තපාල්වරයකු, මෙරට ප‍්‍රධාන පෙලේ පෞද්ගලික රෝහලක වෛද්‍යවරයකු, ප‍්‍රසිද්ධ ව්‍යාපාරිකයකු, ප‍්‍රසිද්ධ දුරකතන සමාගම කළමණාකාරවරයකු ඇතුළු පිරිසක් මේ වන විට මෙම සිද්ධියට අදාළව රක්ෂිත බන්ධනාගාර ගත කර ඇත.