(යොහාන් භාසුර)

ව්‍යාජ රියදුරු බලපත්‍ර 50 සහ කල්ඉකුත් වූ රියදුරු බලපත්‍ර 361 ක් ඇතුළු උපකරණ තොගයක් සමඟ ව්‍යාජ රියදුරු බලපත්‍ර සකස් කිරීමේ නීතිවිරෝධී ව්‍යාපාරයක් කරගනෙ ගිය පුද්ගලයන් තිදෙනෙක් අත්අඩංගුවට ගැනීමට අදිරුප්පුවීදිය පොලිසිය අද (18) සමත් විය.

අදිරුප්පුවීදිය, වත්තල සහ දෙහිවල යන ප්‍රදේශවලදී මෙම පුද්ගලයන් තිදෙනා අත්අඩංගුවට ගත් බව කී පොලිසිය ඔවුන් සතුව තිබී ව්‍යාජ රියදුරු බලපත්‍ර 50 ක්, කල්ඉකුත් වූ රියදුරු බලපත්‍ර 361 ක්, ව්‍යාජ තොරතුරු ඇතුළත් ස්ටිකර් 230 ක්, පරිගණක සහ ලැමිනේටින් යන්ත්‍ර ඇතුළු ව්‍යාජ රියදුරු බලපත්‍ර සකස් කිරීමට යොදාගත් උපකරණ තොගයක් අත්අඩංගුවට ගත් බව ද පොලිසය සඳහන් කළේය.

ව්‍යාජ රියදුරු බලපත්‍ර පහක් සමග ආදුරුප්පුවීදිය ප්‍රදේශයේ පදිංචි පුද්ගලයෙකු අත්අඩංගුවට ගෙන කරන ලද ප්‍රශ්න කිරීමේදී වත්තල ප්‍රදේශයේ පුද්ගලයකු මෙලෙස රියදුරු බලපත්‍ර ව්‍යාජ ලෙස සකස් කරන බවට තොරතුරු හෙළි වූ බවත් ඒ අනුව වත්තල ප්‍රදේශයේ නිවෙසක් වටලා සැකකරු, පරිගණකයක් සහ මුද්‍රණ යන්ත්‍රයක් ඇතුළු උපකරණ පොලිසිය බාරයට ගත් බවත් පොලිසිය කියයි.

වත්තල ප්‍රදේශයෙන් අත්අඩංගුවට ගත් සැකකරුගෙන් කළ ප්‍රශ්න කිරීමේදී දෙහිවල ප්‍රදේශයේ පුද්ගලයකු අත්අඩංගුවට ගත් බවත් ඔහු මෝටර් රථ ප්‍රවාහන දෙපාර්තමේන්තුවේ නිලධාරියෙකු හරහා කල්ඉකුත් වූ රියදුරු බලපත්‍ර කාඩ් පත් මුදලට ගෙන මෙම ජාවාරම සිදුකර ගෙන ගොස් ඇති බව අනාවරණ වූ බවත් පොලිසිය පැවසීය.

මෙම පුද්ගලයන් ව්‍යාජ රියදුරු බලපත්‍ර 1000 කට අධික ප්‍රමාණයක් මේ වන විට අළෙවි කර ඇති බවත් රියදුරු බලපත්‍රයක් රුපියල් 13000 බැගින් අලෙවි කර ඇතැයි ද පොලිසිය කියයි.

ආදුරුප්පුවීදිය පොලිස් ස්ථානාධිපති පොලිස් පරීක්ෂක අජිත් මෙත්තානන්ද මහතාගේ අධීක්‍ෂණයෙන් උප පොලිස් පරීක්‍ෂක සරත් කුමාර මහතා ප්‍රමුඛ කණ්ඩායමක් මෙම මෙහෙයුම ක්‍රියාත්මක කළහ.