ජනාධිපති අපේක්ෂක ගෝඨාභය රාජපක්ෂ මහතාගේ පුරවැසිභාවය ප්‍රශ්න කරමින් දැමූ ‘කමෙන්ටුවක්’ වාරණය කිරීම සම්බන්ධයෙන් විදුලි සංදේශ, විදේශ රැකියා සහ ක්‍රීඩා අමාත්‍ය හරීන් ප්‍රනාන්දු මහතා ඉකුත් දා ෆේස්බුක් සමාගමට චෝදනා කළේය.

හිටපු ජනාධිපති මහින්ද රාජපක්ෂ මහතාගේ සහෝදරයා වන ගෝඨාභය රාජපක්ෂ මහතාගේ පුරවැසියභාවය ජනාධිපතිවරණ ඡන්ද විමසීමේ ප්‍රධාන සාධකයක් බවට පත්ව තිබේ. ශ්‍රී ලංකාවේ නීතිය අනුව ද්විත්ව පුරවැසිභාවය හිමි තැනැත්තන්ට ඡන්දයෙන් තේරී පත්වන තනතුරු දැරිය නොහැක.

ගෝඨාභය රාජපක්ෂ මහතා ඇමෙරිකානු ජාතිකයකු බවත් ඔහුට ජනාධිපතිවරණයට ඉදිරිපත් විය හැකිදැයි විමසමින් අමාත්‍ය හරීන් ප්‍රනාන්දු මහතා ෆේස්බුක් සටහනක් තබා තිබිණි.

“රාජපක්ෂ මහතාට ශ්‍රී ලංකාවේ ජනාධිපතිවරණයට තරග කළ හැකි ද ?” විමසමින් ෆේස්බුක් සටහනක් දැමූ අතර එය මේ වනවිට ඉවත් කර තිබේ.

“ජනාධිපති ධුරයට පත් වුවහොත් ඔහුට දිවුරුම් දිය හැකි ද ? තනතුරේ බලතල දැරිය හැකි ද? ” යනුවෙන් ද එම ෆේස්බුක් සටහනින් විමසා තිබිණි.

ගෝඨාභය රාජපක්ෂ මහතා 2003 වසරේදී ඇමෙරිකා එක්සත් ජනපදයේ පුරවැසිභාවය ලබාගත්තේය. වසර 20කට අධික කාලයක් ශ්‍රී ලංකාවේ යුද හමුදාවේ සේවය කරමින් සිට ඉන් ඉවත්ව ඇමෙරිකා එක්සත් ජනපදයේ ලොස් ඇන්ජලීස් වෙත සංක්‍රමණය විය. ඒ මහතා 2005 වසරේදී නැවත වරක් ශ්‍රී ලංකාවට පැමිණි අතර සිය සහෝදරයාගේ සමයේදී ආරක්ෂක අමාත්‍යාංශයේ ලේකම්වරයා ලෙස පත්විය. එසේ පත්වීම් ලැබීමට පෙර තමන් ශ්‍රී ලංකාවේ පුරවැසිභාවය ලබාගත් බව ගෝඨාභය රාජපක්ෂ මහතා පවසයි.

තමන් ඇමෙරිකා එක්සත් ජනපදයේ පුරවැසිභාවය අත්හළ බව ගෝඨාභය රාජපක්ෂ මහතා ස්ථීරවම කියා සිටී.

ෆේස්බුක් සමාගම තම අමාත්‍යාංශයට අයත් නිල ෆේස්බුක් පිටුවෙන් අදාළ ෆේස්බුක් සටහන ඉවත් කර ඇති බවත් සිය ට්විටර් ගිණුම ඔස්සේ අමාත්‍ය හරීන් ප්‍රනාන්දු චෝදනා කළේය. එම ෆේස්බුක් සටහනම හරීන් ප්‍රනාන්දු මහතාගේ පෞද්ගලික ෆේස්බුක් ගිණුමේ දක්නට තිබේ. රාජපක්ෂ මහතාට ඇමෙරිකා එක්සත් ජනපදයේ සහාය හිමිවන බවට ද හරීන් ප්‍රනාන්දු මහතා චෝදනා කරන අතර එහි තිරඡායාරූප ද (ස්ක්‍රීන්ෂොට්ස්) ද හරීන් ප්‍රනාන්දු මහතා විසින් ප්‍රසිද්ධියට පත් කරනු ලැබ තිබේ.

“ඇමෙරිකාව වෙනුවෙන් ඇමෙරිකානු සමාගම් ශ්‍රී ලංකාවේ මැතිවරණයට මැදිහත් විය යුතු නැහැ. මම කිව්ව දේ වෙනුවෙන් මම පෙනී සිටිනවා” යැයි හරීන් ප්‍රනාන්දු මහතා ට්විටර් පණිවුඩයක් නිකුත් කරමින් සඳහන් කර තිබිණි.

ෆේස්බුක් සමාජ ජාල වෙබ් අඩවිය සාමාන්‍යයෙන් පෞද්ගලික හෝ රහසිගත තොරතුරු ඇතුළත් ඕනෑම සටහනක් (පෝස්ටුවක්) ඉවත් කරන බව ෆේස්බුක් සමාගමේ ප්‍රකාශකයෙක් පැවැසීය.

“අපි දැනගත් විගස අපි මෙම අන්තර්ගතය (ෆේස්බුක් සටහන) ඉවත් කළා”ෆේස්බුක් සමාගම ප්‍රංශ පුවත් සේවයට ප්‍රකාශ කළේය.

මේ අතර ෆේස්බුක් සමාගම (ෆේස්බුක් සමාජ ජාලය) දේශපාලන කතා වාරණය නොකරන බව එම සමාගමේ ප්‍රධානී මාර්ක් සකර්බර්ග් පසුගිය මාසයේදී පැවැසීය.

“තාක්ෂණික සමාගම් 100%ක් සත්‍ය යැයි තීරණය කරන දෑ පමණක් දැකිය හැකි ලෝකය ඔබ ජීවත් විය යුතු යැයි මම හිතන්නේ නැහැ” යැයි ඔහු කීවේය.

ගෝඨාභය රාජපක්ෂ මහතාගේ පුරවැසිභාවය සම්බන්ධයෙන් පොලිස් විමර්ශනයක් ද පැවැත්වෙන අතර මැතිවරණයෙන් පසු ඒ සම්බන්ධයෙන් නඩු විභාගයක් ද පැවැත්වීමට නියමිතය.

එහෙත් ඔහු ජයග්‍රහණය කළහොත් ධුර කාලය තුළදී මුක්තිය හිමි වන බැවින් එයින් ඔහුට බලපෑමක් සිදු නොවනු ඇත.

ගෝඨාභය රාජපක්ෂ මහතාගේ පුරවැසිභාවය සම්බන්ධයෙන් ෆේස්බුක් ඇතුළු සමාජ මාධ්‍යවල දිගින් දිගටම තර්ක විතර්ක, වාද විවාද දක්නට ලැබේ. රාජපක්ෂ මහතාගේ නීතිඥයන් අවලංගු කළේ යැයි කියන ගෝඨාභය රාජපක්ෂ මහතාගේ ගුවන් ගමන් බලපත්‍රයේ  පිටපතක් මාධ්‍ය හමුවකදී පෙන්වූ අතර එය අසත්‍ය ලියවිල්ලක් යැයි ද චෝදනා එල්ල වී තිබේ.

මේ සම්බන්ධයෙන් ප්‍රකාශ නිකුත් කිරීම කොළඹ ඇමෙරිකානු තානාපති කාර්යාලය විසින් ප්‍රතික්ෂේප කරනු ලැබ තිබේ.

ජනාධිපතිවරණය සෙනසුරාදා (නොවැම්බර් 16) වැනිදා පැවැත්වීමට නියමිත අතර ඊට අපේක්ෂකයෝ 35 දෙනෙක් ඉදිරිපත් වී සිටිති.

(ප්‍රංශ පුවත් සේවය ඇසුරිනි) 
 
055