( තිළිණි ද සිල්වා සහ රංජන් කටුගම්පොළ )

කොවිඩ් 19 වසංගත ව්‍යාප්තිය හේතුවෙන් ලබන 31 වැනිදා තෙක් හදිසි අතවශ්‍ය නඩු පමණක් විවෘත අධිකරණය හමුවේ කැදවන බව ශ්‍රේෂ්ඨාධිකරණ ලේඛකාධිකාරී ප්‍රදීප් මහමුතුගල මහතා නිවේදනයක් නිකුත් කරමින් කියා සිටී.

මෙසේ විවෘත අධිකරණයේ කැදවීමට අවශ්‍ය හදිසි හා අත්‍යවශ්‍ය නඩු අදාළ පාර්ශවකරුවන්ට දැනුම් දීමෙන් පසු මෝසමක් මාර්ගයෙන් කැදවිය හැකි බවද , මෙම නඩු විභාගයන් පෙරවරු 11.00ට ආරම්භ කරන බවද ශ්‍රේෂ්ඨාධිකරණ ලේඛකාධිකාරීවරයා නිකුත් කළ නිවේදනයේ සදහන් වේ.

අදාළ විනිසුරුවරයාගේ අවසරයකින් තොරව නඩු වලට සම්බන්ධ පාර්ශවකරුවන්ට අධිකරණ ශාලාවට ඇතුළත් විය නොහැකි බවත් ,සියලුම නීතීඥවරුන් කොවිඩ් 19 සෞඛ්‍ය මාර්ගෝපදේශ මාලාව පිළිපැදිය යුතු බවත් , එහි වැඩිදුරටත් සදහන් වේ.

නීතීඥවරයෙකු අධිකරණ ශාලාවකට ඇතුළ විය යුත්තේ ඔවුන්ට ආදළ නඩුව කැදවන අවස්ථාවේදී පමණක් බවත් , ලබන 31 වැනිදා සියලුම නඩු කටයුතු වලට සම්බන්ධ ලේඛන පෙරවරු 9.00 සිට මධ්‍යහ්න 12.00 දක්වා ලේඛකාධිකාරී කාර්යාලයට බාර දිය හැකි බවද ශ්‍රේෂ්ඨාධිකරණ ලේඛකාධිකාරිවරයා නිකුත් කළ නිවේදනයේ සදහන් වේ.