(+++ උණවටුන ඩී.ජී සුගතපාල, අලුත්ගම තුසිත කුමාර ද සිල්වා, කරාපිටිය ජී.ඩබ්ලිව් ප්‍රේමතිලක ද සිල්වා, හික්කඩුව අමරසේන විතාන)

ලබන මහ මැතිවරණයේදී තමා ශ්‍රී ලංකා පොදුජන පෙරමුණේ අපේක්ෂකයෙකු ලෙස ගාල්ල දිස්ත්‍රික්කයට  තරග කරන බව ශ්‍රී ලංකා ක්‍රිකට් කණ්ඩායමේ හිටපු නායක තිලකරත්න ඩිල්ෂාන් මහතා ඊයේ (3) බෙන්තොට හෝටලයක පැවති මාධ්‍ය හමුවකදී පැවසීය.

තමා ආරම්භ කරන මෙම අලුත් ඉනිමට ක්‍රිකට් ක්‍රීඩාවේදී සහය දුන් අයුරින්ම කිසිදු බේදයකින් තොරව සියලු දෙනාගේම සහය ලැබෙනු ඇතැයි අපේක්ෂා කරන බවද ඔහු කීය.

ජනාධිපති ගෝඨාභය රාරපක්ෂ මහතා රට වෙනුවෙන් පැහැදිලි වැඩ පිළිවෙළක් ඉදිරිපත් කර ඇති නිසා එතුමාගේ එම වැඩපිළිවෙළට සහාය දැක්වීම සඳහා තමා මෙම තීරණය ගත් බව ද හෙතෙම පැවසීය.

තමා ගාල්ල දිස්ත්‍රික්කයේ නිවාස 1000 ක් ඉදිකර ඇති බවත් පවුල් 7500 ක දරුවන් 8000 කට ශිෂ්‍යත්ව ලබාදී ඇති බවත් කී තිලකරත්න ඩිල්ෂාන් මහතා ඊට අමතරව පෙර පාසල් 5 ක් සාදා දී ඇති බව ද දුප්පත් පාසල් සඳහා ක්‍රීඩා උපකරණ ලබා දී ඇති බව ද කීය.

ඉදිරි වසර  පහ තුළදි ගාල්ල දිස්ත්‍රික්කයේ එක් ආසනයකට නිවාස 50 බැගින් ඉදිකර දෙන බව ද ඔහු සඳහන් කළේය.

ක්‍රිකට් ක්‍රීඩාව තුළින් ලද ජයග්‍රහණ මත ඇතිකරගත් විදේශීය සබඳතා ප්‍රයෝජනයට ගෙන ගාල්ල දිස්ත්‍රික්කය දියුණු කිරීමට පියවර ගන්නා බව ද හෙතෙම කීය.