සිංහල සිනමාවේ පුරෝගාමියකු වූ ඉන්දීය චිත්‍රපට අධ්‍යක්ෂ ඇන්තනි බාස්කර් රාජ් (ඒ.බී.රාජ්) මහතා පසුගියදා තමිල්නාඩුවේ චෙන්නායි නුවරදී අභාවප්‍රාප්ත විය. මියයන විට දී ඒ මහතා 95 වැනි වියේ පසුවිය.

සිංහල සිනමාවේ මුල් කාලින චිත්‍රපට වූ අහංකාර ස්ත්‍රී, රම්‍යලතා, ප්‍රේම තරගය, සොහොයුරෝ, පෙරකදෝරු බෑණා, වන මෝහිනී’ වැනි සිංහල චිත්‍රපට රැසක් ඔහු අතින් අධ්‍යක්ෂණය වී සිංහල සිනමාවට එක්විය.

‘සුන්දර සවුන්ඩ්’ චිත්‍රාගාරයෙන් සිනමාකරණයට පිවිසෙන ඒ. බී. රාජ් මහතා, සිංහල භාෂාවද මනා ලෙස හසුරුවන්නට සමත්ව සිටියේය. දෙමළ, මලයාලම් හා සිංහල බසින් ඔහු නිර්මාණය කළ චිත්‍රපට සංඛ්‍යාව 55කි.

සුප්‍රකට ඉන්දීය දමිළ නිළි ශරන්‍යා ඔහුගේ දියණියකි.

සිංහල සිනමාව හැදී වැඩී එන සමයේදී ඉන්දීය සිනමාවේ තාක්ෂණය සහ ක්‍රමවේද ශ්‍රී ලංකාවට ගෙන එමින් සිංහල සිනමාවේ පුරෝගාමියකු වශයෙන් කටයුතු කළ ඒ. බී. රාජ් මහතා චිත්‍රපට නිෂ්පාදකවරයකු වශයෙන් පමණක් නොව, තිර රචකයකු හා අධ්‍යක්ෂවරයකු වශයෙන්ද කටයුතු කළේය.


(***)