(නිමන්ති රණසිංහ)

මුදලට බෝලිං ක්‍රීඩාව කරද්දී ඇතිවූ බහින්බස්වීමක් දුරදිග ගොස් 19 හැවිරිදි සිසුවෙකුට පුටුවකින් පහරදී උස්සා පොළොවේ ගසා බරපතල තුවාල කළැයි කියන සිද්ධිකයකට අදාළ පෞද්ගලික අධ්‍යාපන ආයතනයක සිසුවකු ලබන 10 වැනිදා තෙක් රක්ෂිත බන්ධනාගාර ගත කරන ලෙස කොළඹ අතිරේක මහෙස්ත්‍රාත් ඉසුරු නෙත්තිකුමාර මහතා අද (04) නියෝග කළේය.

මෙම සැකකරුවන් තවමත් ශිෂ්‍යයින් වීමත් තුවාල ලැබූ අනෙක් ශිෂ්‍යයාගේ කොදු ඇටපෙළට හානියක් සිදුවුවහොත් එය මිල කළ නොහැකි බවත් සඳහන් කළ අධිකරණය සැකකාර ශිෂ්‍යයා රක්ෂිත බන්ධනාගාර ගත කිරීමටත් සැකකරු ශිෂ්‍යයෙක් වූ බැවින් ඒ සම්බන්ධයෙන් විශේෂ සැලකිල්ලක් දක්වනට ලෙසටත් බන්ධනාගාර අධිකාරිවරයාට නියම කළේය.

මෙම සිද්ධියට අදාළව මේ වන විට රෝහල්ගතව ප්‍රතිකාර ලබමින් සිටින සිසුවාගේ කොදු ඇට පෙළට හානි සිදුවී ඇත්දැයි යන්න සම්බන්ධයෙන් වෛද්‍ය පරීක්ෂණයක් සිදුකරමින් පවතින බවත් බම්බලපිටිය පොලීසිය අධිකරණයට කරුණු අණාවරණය කළේය.