(ප්‍රසන්න පත්මසිරි)

හාලිඇල, ගලඋඩ ප්‍රදේශයේ  මුස්ලිම් පාසලක  ඉගෙනුම  ලබන බාල  වයස්කාර  ශිෂ්‍යාවක් සහ ශිෂ්‍යයන් 13දෙනෙකු ලිංගික අපයෝජනයට ලක්කළ බවට චෝදනා ලැබූ එම පාසැලේම සැකකාර ක්‍රීඩා ගුරුවරයාගේ වැඩ තහනමට ලක් කළ බව ඌව පළාත් අධ්‍යාපන ලේකම් සන්ධ්‍යා අඹන්වෙළ මහත්මිය පැවසුවාය.

වියලුව අධ්‍යාපන කළාපයට අයත් ගලඋඩ අල් නුරානියා විදුහලේ ක්‍රීඩා ගුරුවරයා වන රාමචන්ද්‍රන් රමේෂ් (44) නැමති පුද්ගලයාගේ වැඩ තහනම් කර  තිබේ.

සිද්ධිය සම්බන්දයෙන් පළාත් අධ්‍යාපන අමාත්‍යාංශයේ ලේකම්තුමියගේ උපදෙස් මත අමාත්‍යාංශයේ නිලධාරීන් කණ්ඩායම කළ මූලික පරීක්ෂණයේදී ළමා අපචාරයක් සිදුවී ඇති බවට තොරතුරු අනාවරණය වීමත් සමග වියලුව කලාප අධ්‍යාපන අධ්‍යෂකවරයාගේ නිර්දේශය මත අමාත්‍යාංශ ලේකම් විසින් ගුරුවරයාගේ වැඩ තහනමට ලක්කර තිබේ.

අපයෝජනයට ලක්වූ මෙම සිසුන් වයස අවුරුදු 15 සහ 16 යන වයස් කාණ්ඩවලට අයත් බවද, ශිෂ්‍යාවක්සහ ශිෂ්‍යයන් 5 දෙනෙකු බරපතළ ලිංගික අපයෝජනය ලක් කලැයි මුලදී පැමිණිලි ලැබී තිබූ අතර මේ වනවිට එම පැමිණිලි සංඛ්‍යාව 13 දක්වා ඉහළ ගොස් ඇතැයි බදුල්ල පොලිස් අධිකාරි වසන්ත කන්දෙවත්ත මහතා පැවසීය.

අපයෝජනයට ලක්වු සිසුවිය සහ  සිසුන්ව බදුල්ල මහ රෝහලට පරීක්ෂණ කටයුතු සඳහා ඇතුළත් කර ඇති බව පොලීසිය කියයි.