තුර්කියෙන් සිරියාව වෙත එල්ල කරන ප්‍රහාර වහාම නැවැත්විය යුතු බව ප්‍රංශ ජනපති එමානුවෙල් මැක්‍රොන් මහතා පවසයි.

ඇමරිකානු හා තුර්කි ජනාධිපතිවරුන්ට තමා දුරකථනයෙන් කථාකර මේ බව දැනුම්දුන් බවද දිගින් දිගටම ප්‍රහාර එල්ල වුවහොත් එමගින් මානුෂීය අර්බුදයක් නිර්මාණය වීමේ අවදානමක් පවතින බවද හෙතෙම වැඩිදුරටත් සඳහන් කර ඇත.

"මෙම ප්‍රහාර නැවැත්විය යුතු බව අපේ පොදු අපේක්ෂාවයි. මෙවැනි ආක්‍රමණ හේතුවෙන් මානවවාදී ගැටලු නිර්මාණය වීම වැළැක්විය නොහැකියි. එමෙන්ම අයිඑස් සංවිධානය කලාපයේ නැවත මතුවීමටත් උපකාරයක් වෙනවා," යැයි ප්‍රංශ ජනපතිවරයා අවධාරණය කර ඇත.

ප්‍රංශයේ එලිසි මන්දිරයේදී ජනාධිපතිවරයා මාධ්‍ය අමතමින් මෙම අදහස් පළකර ඇති අතර එම අවස්ථාවට ජර්මන් කුලපති ඇන්ජෙලා මාර්කල් මහත්මිය ද හංගේරියානු අගමැති වික්ටර් ඕබන් මහතා ද සහභාගී වී ඇත.
 
(රොයිටර් පුවත් ඇසුරිණි - 085)