(නිමල කොඩිතුවක්කු)

සමගි ජන බලවේගය සදහා නව ආසන සංවිධායකවරුන් සහ දිස්ත්‍රික් සංවිධායකවරුන් 31 දෙනකු අද (29) පත් කළේය.

විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් මෙයට අදාළ පත්වීම් කොළඹ මාක්ස් ප්‍රනාන්දු මාවතේ පිහිටි විපක්ෂ නායක කාර්යාලයේ දී පිරිනැමිණ.

ආසන සංවිධායකවරුන් දාහත් දෙනකුට සහ දිස්ත්‍රික් සංවිධායකවරුන් දාහතර දෙනකුට මෙම පත්වීම් ප්‍රදානය කළ බව සමගි ජන බලවේගය මහලේකම් රංජිත් මද්දුම බණ්ඩාර මහතා පැවසීය.

සමගි ජන බලවේගය සඳහා නව ආසන සංවිධායකවරුන් 107 දෙනකු සහ දිස්ත්‍රික් සංවිධායකවරු අටදෙනකු මෙයට පෙර පත් කළ බව පක්ෂ ආරංචි මාර්ග කියයි.

සමගි ජන බලවේගය නුතනවාදී විපක්ෂයක් ලෙස ජනතා අවශ්‍යතාවයන් හඳුනා ගෙන ඒ අනුව කටයුතු කරමින් යන බවත් ඒ සඳහා තම ශක්තිය ලබා දෙන ලෙසට එහිදී විපක්ෂනායකවරයා ආසන සංවිධායකවරුන් වෙත දැනුම් දෙනු ලැබීය.

පක්ෂයේ ඉදිරි වැඩපිළිවෙළ සහ යාන්ත්‍රණය සම්බන්ධයෙන් ආසන සංවිධායකවරුන් දැනුවත් කළේය.