(අංජුල මහික වීරරත්න)

 අනේකවිධ දුක්ගැහැට විඳිමින් කොරෝනා රෝගයෙන් ජනතාව ගලවා ගැනීම සඳහා කටයුතු කරන සෞඛ්‍ය සේවකයන්ගේ වෘත්තීය අයිතිවාසිකම් කිසිවක් ලබා නොදීම නිසා ලබන 8 වැනිදා යළි වෘත්තීය සමිති ක්‍රියාමාර්ගයක් ගන්නා බවට සෞඛ්‍ය වෘත්තීය සමිති එකමුතුව සෞඛ්‍ය අමාත්‍ය කෙහෙළිය රඹුක්වැල්ල මහතාට ලිඛිතව දැනුම් දුන් බව රජයේ හෙද නිලධාරීන්ගේ සංගමයේ සභාපති සමන් රත්නප්‍රිය මහතා පැවසීය. 

සුව විරුවන් යැයි බොරුවට නම් කිරීමෙන් ඵලක් නැති බව කී රත්නප්‍රිය මහතා තම ඉල්ලීම් ඉදිරිපත් කිරීමට අඩුම තරමින් සාකච්ඡාවක් වත් නොදුන් නිසා ඔක්තෝබර් 8 වෙනිදා දවස පුරා සේවයෙන්  ඉවත් වීමේ ක්‍රියා මාර්ගයක් සහ එදින රට පුරා උද්ඝෝෂණ ව්‍යාපාරයක් පැවැත්වීමට තීරණය කර ඇතැයි සෞඛ්‍ය අමාත්‍යවරයාට දැනුම් දුන් බව සමන් රත්නප්‍රිය මහතා සඳහන් කළේය.

කොරෝනා මර්දනය සඳහා සියලු සෞඛ්‍ය කාර්යය මණ්ඩලයට පහසුකම් ලබා නොදීම ඇතුළු ඉල්ලීම් අටක් මුල් කර ගනිමින් සෞඛ්‍ය වෘත්තීය සමිති එකමුතුව මෙම වෘත්තීය ක්‍රියා මාර්ගය ගැනීමට සැරසෙයි.