(ඩයනා උදයංගනී)

ශ්‍රී ලංකා නිදහස් පක්‍ෂයට නව තනතුරු කිහිපයක් හඳුන්වාදීමට එම පක්‍ෂයේ සභාපති, ජනාධිපති මෛත‍්‍රීපාල සිරිසේන මහතා කටයුතු කර තිබේ.

ඒ අනුව ශ්‍රී ලංකා නිදහස් පක්ෂයේ ප‍්‍රචාරක ලේකම්වරයා ලෙස හිටපු අමාත්‍ය, පාර්ලිමේන්තු මන්ත‍්‍රී රංජිත් සියඹලාපිටිය මහතා පත්කරනු ලැබ ඇත.

මීට අමතරව පක්‍ෂයේ වෘත්තීය සමිති ලේකම්වරයා ලෙස හිටපු නියෝජ්‍ය අමාත්‍ය පාර්ලිමේන්තු මන්ත‍්‍රී ලසන්ත අලගියවන්න මහතාත්,  වෘත්තීයවේදීන්ගේ ලේකම්වරයා වශයෙන් හිටපු නියෝජ්‍ය අමාත්‍ය, පාර්ලිමේන්තු මන්ත‍්‍රී සාරථී දුෂ්මන්ත මිත‍්‍රපාල මහතාත් පත්කරනු ලැබ සිටිති.

ශ්‍රී ලංකා නිදහස් පක්‍ෂ සභාපති, ජනාධිපති මෛත‍්‍රීපාල සිරිසේන මහතා විසින් පක්‍ෂ මධ්‍යම කාරක සභාවේද අනුමැතිය ඇතිව මෙම පත්කිරීම් සිදුකළ බව එම පක්‍ෂයේ ප‍්‍රකාශකයෙක් ලංකාදීපයට පැවසීය.

ඔවුන්ට පත්වීම් ලිපි ප‍්‍රදානය කිරීම ද ජනාධිපති ලේකම් කාර්යාලයේදී ජනාධිපතිවරයා අතින් අද (28) සිදුකෙරිණි.