(එම්.කේ.නන්දසේන)

පසුගිය වසරේ අධික වර්ෂාව හේතු කරගෙන කැඩී බිඳීගිය යාල ජාතික වනෝද්‍යානයේ වැව් පද්ධතිය සහ මාර්ග පද්ධතිය මේ දිනවල කඩිනමින් පිළිසකර කරමින් පවතින බව ඌව කලාපය බාර වනජීවී සහකාර අධ්‍යක්ෂක උපුල් ඉන්ද්‍රජිත් මහතා පැවසීය.

මෙම වැව් පද්ධතියෙන් පලටුපාන වැව, බුතව වැව, ගෝනගලවැව, දළුක්කඩ වැව, ගිණි කසය වැව අලුත්වැඩියා කටයුතු මේ වන විටත් නිමවෙමින් පවතින බවද කීය.

මීට අමතරව පළටුපාන සිට යාල පිවිසුම් දොරටුව දක්වා ඇති කිලෝමීටර් 16 ක් දුරැති ප්‍රධාන මාර්ගයේ ද අලුත්වැඩියා කටයුතු ආරම්භ වී ඇති බවත්, අභ්‍යන්තර මාර්ග පද්ධතියේ ද බුතව පාර, ආකාශ චෛත්‍යය පාර, ඌරනිය පාර, වරහන පාර, ජඹුරාගල ඇතුළු කිලෝමීටර් 122 ක් දුරැති මාර්ග පද්ධතියේ අලුත්වැඩියා කටයුතු ද නිම වීමට ආසන්න බවත් කියා සිටියේය.

උද්‍යානය ඇතුළත පිහිටි වරහන, මහාශීලව, ඔන්ඩචිචි, තල්ගස්මංකඩ යනාදී නිවාඩු නිකේතන ද අලුත්වැඩියා කළ බවත් කීය.

කොරෝනා වසංගතය හේතුවෙන් යාල උද්‍යානය වැසී තිබූ කාලසීමාවේ ද සමස්ත කාර්ය මණ්ඩලයේ කැපවීම මත මෙම කටයුතු ඉටුකිරිමෙන් බොහෝ ව්‍යාපෘති නිම කිරීමට හැකිවූ බව නියෝජ්‍ය උද්‍යානයභාර නිලධාරී අජිත් වසන්ත කුමාර මහතා පෙන්වා දුන්නේය.