2021 ඔක්තෝබර් මස 21 වන බ්රහස්පතින්දා
(බිඟුන් මේනක ගමගේ)
පොළොන්නරුව දිස්ත්‍රික් ලේකම් කාර්යාලයට යාබදව අභිනවයෙන් ඉදිකර ඇති සිව්මහල් කාර්යාල සංකීර්ණය, මැතිවරණ ප්‍රචාරණය සඳහා අනිසි වාසියක් ගැනීමේ අරමුණෙන් ජනාධිපති මෛත්‍රිපාල සිරිසේන මහතාගේ ප්‍රධානත්වයෙන් ලබන 2 වැනිදා විවෘත කිරීමට නියමිත යැයි මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය මැතිවරණ කොමිසමට ලිපියක් යොමු කරමින් අද (30) පැමිණිල්ලක් ඉදිරිපත් කර ඇත.
එම කාර්යාල සංකීර්ණය විවෘත කිරීමට නියමිතව තිබුණ ද අද පස්වරුව වනවිටත් එහි ඉහළ මහල්වල පලංචි පවා ඉවත් කර නැතැයි ද ජනතා අයිතියට පැවරීමට පෙර ලබාගත යුතු ඉංජිනේරුවන්ගේ අනුමැතිය නිල වශයෙන් ඊට හිමිව නැතැයි ද මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය කළ පැමිණිල්ලේ සඳහන් වේ.
ජනාධිපතිවරයා ප්‍රචාරණ ව්‍යාපාරයෙන් ඉවත් වී ස්වාධීනව කටයුතු කරන බව පැවසුවද ඔහු විසින් පත් කරන ලද ආණ්ඩුකාරවරුන් බහුතරයක් තමන්ට අභිමත පරිදි දේශපාලන පක්ෂ ප්‍රවර්ධනය කරමින් අගතිගාමීව හැසිරීම විශාල ගැටලුවක් යැයි ද වැඩ අවසන් නොකර ජනතා අයිතියට පැවරීමට සූදානම් මෙම ගොඩනැගිල්ල එවැනි දේශපාලන ප්‍රචාරණ උපක්‍රමයක්ද යන පැනය මතුව ඇතැයි ද එම සංවිධානයේ ජාතික සම්බන්ධීකාරක මංජුල ගජනායක මහතාගේ අත්සනින් යුතුව කළ පැමිණිල්ලේ වැඩිදුරටත් සඳහන් වේ.
අදාළ ගොඩනැල්ලේ ඡායාරූප ද පැමිණිල්ලට අදාළ සාක්ෂි හැටියට මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය කොමිසමට ලබාදීමට කටයුතු කර ඇත.
