(ජයන්ත සමරකෝන්)
 
පසුගිය දිනයන්හිදී  වැලිකඩ බන්ධනාගාරය තුළට  බන්ධනාගාර තාප්පයෙන් විසි කළ  පාර්සල් තුළ තිබූ ජංගම දුරකතන බැටරි  සහ මත් ද්‍රව්‍ය සියල්ල බන්ධනාගාර කාන්තා අංශයේ රැඳවියන්  දෙදෙනකු ඉලක්ක කරගනිමින්  විසි කර ඇති බවට තොරතුරු  අනාවරණය වී ඇතැයි බන්ධනාගාර ආරංචි මාර්ග කියයි.
 
තහනම් ද්‍රව්‍ය හා උපකරණ අලෙවිකරමින්  සිටි  බව කියන  එම  කාන්තා රැදවියන් දෙදෙනා කවුරුන්ද යන්න හඳුනාගෙන ඇති අතර  ඔවුන්   දෙදෙනා මේ වන විට  අඟුණකොළ පැලැස්ස බන්ධනාගාරයට මාරු කර  එහි විශේෂ සිර කුටියක රඳවා ඇතැයි එම ආරංචිමාර්ග සඳහන් කරයි.
 
එහි  එක් කාන්තා රැඳවියෙක්  වනාතමුල්ල සීවලී පටුමඟ දෙසින්  බන්ධනාගාරය තුළට  දමන ජංගම දුරකතන බැටරි  ආරෝපණය කර  අලෙවි කර ඇති අතර  අනෙක් කාන්තාව මත් ද්‍රව්‍ය  අලෙවිය සිදු කර ඇතැයි හෙළිව තිබේ.
 
බැටරි ආරෝපණය කර අලෙවි කිරීම මෙම කාන්තා අංශය තුළ ඉහළ පෙලේ ජාවාරමක් බවට පත්ව ඇතැයි ද  මේ සඳහා  එක් බැටරියකට රුපයල් 3000-4000 ක් අතර මුදලක් අය කර ඇතැයිද හෙළිව තිබේ.
 

එම පාර්සල්වලින් දිගින් දිගටම හමු වී ඇත්තේ   ජංගම දුරකතන බැටරි බවද , ඉකුත් දිනකදී එක් බෑගයක ජංගම දුරකතන බැටරි 167 ක් තිබී ඇතැයිද වාර්තා වෙයි.