(මනෝප‍්‍රිය ගුණසේකර)
 
රනිල් වික‍්‍රමසිංහ මහතාගේ පාලන කාලය අවසන් කර මහින්ද රාජපක්‍ෂ මහතා අගමැතිවරයා ලෙස පත්කර ගනිමින් ආරම්භ කළ මෙම රාජ්‍ය පාලන ක‍්‍රමය රට පැත්තෙන් බලන විට රටට හිතකර ඉතාම හොඳ දෙයක් යැයි යුතුකම පදනමේ සභාපති ගෙවිඳු කුමාරතුංග මහතා අද (18) පැවසීය.

පසුගියදා පාර්ලිමේන්තුව තුළ සිදුවු ක‍්‍රියාවන්ට වඩා විශ්වාසභංග යෝජනාව ඉදිරිපත් කළ ආකාරය හා ඊට අනුකූල වු කරුණු අශෝබන බවත් මේ ප‍්‍රජාතන්ත‍්‍රවාදයේ දෙවිවරුන්ගේ ක‍්‍රියාකලාපයද? යන්න ප‍්‍රශ්න කළ ගෙවිඳු කුමාරතුංග මහතා මෙවැනි තත්වයක් තුළ පාර්ලිමේන්තුව විසුරුවා හැර මේ සඳහා විසඳුමක් ලබාදීමට ජනතාවට අවස්ථාවක් ලබාදෙන්නැයි ඉල්ලීමක් ද කළේය.

‘විදේශ බලවේග පරදවමු - මව්බිමට අලූත් ගමනක්’ යන තේමාව යටතේ කොළඹ 07 බෞද්ධ මන්දිරයේ පැවැත්වු මාධ්‍ය සාකච්ඡාවක් අමතමින් ගෙවිඳු කුමාරතුංග මහතා එසේ පැවසීය.

එහිදී වැඩිදුරටත් අදහස් දැක්වු ගෙවිඳු කුමාරතුංග මහතා මෙසේ ද  පැවසීය.

ජාතික රජයක ප‍්‍රධාන පක්‍ෂය ඉන් ඉවත් වු වහාම එම රජය විසිරී යනවා. ප‍්‍රධාන පක්‍ෂය ජාතික ආණ්ඩුවෙන් ඉවත් වු පසුව ආණ්ඩුව පවත්වාගෙන යෑමේ සදාචාරාත්මක අයිතියක් අනිත් පක්‍ෂයට නැති වෙනවා. මේ තත්ත්වය යටතේ ඇත්ත වශයෙන්ම සිදුවිය යුතුව තිබුණේ එක්සත් ජාතික පක්‍ෂය රජයෙන් ද රනිල් වික‍්‍රමසිංහ මහතා අගමැති ධුරයෙන් ද ඉවත්වීමයි. නමුත් එය සිදුනොවීම තමයි මෙම ප‍්‍රශ්නය ඇතිවීමට ප‍්‍රධාන හේතුව ලෙස අපි දකින්නේ.