(දසුන් රාජපක්ෂ)

වගඋත්තරකාර පාර්ශවයේ සාක්ෂිකරුවෙකු ලෙස නම් කර සිටින වැඩ බලන පොලිස්පති සී.ඩී වික්‍රමරත්න මහතාට දේශපාලන පළිගැනීම් පිළිබඳ විමර්ශනය කරන ජනාධිපති කොමිසම හමුවේ ලබන 7වැනිදා පෙනී සිටීමට එම කොමිසමේ සභාපති විශ්‍රාමික ශ්‍රේෂ්ඨාධිකරණ විනිසුරු උපාලි අබේරත්න මහතා දෙවැනි වතාවටත් අද (3) නොතීසි නිකුත් කළේය.

මෙම ජනාධිපති කොමිසම හමුවේ අද පෙනී සිටින ලෙස අගෝස්තු 31වැනිදා වැඩ බලන පොලිස්පති සී.ඩී. වික්‍රමරත්න මහතාට නොතීසි නිකුත් කර තිබිණි.  ඒ මහතා අද කොමිසම හමුවේ පෙනී නොසිටීම හේතුවෙන් මෙලෙස යළිත් නොතීසි නිකුත් කෙරිණි.

අසත්‍ය චෝදනා ගොනුකර දේශපාලනිකව පළිගැනීම සඳහා සිය රැකියාවෙන් නෙරපීම සම්බන්ධයෙන් ජ්‍යෙෂ්ඨ නියෝජ්‍ය පොලිස්පති ලලිත් ජයසිංහ මහතා කර ඇති පැමිණිල්ලේ වගඋත්තරකරුවකු ලෙස නම් කර සිටින සහකාර පොලිස් අධිකාරී කිංස්ලි ගුණසේකර මහතාගේ සාක්ෂිකරුවෙකු වශයෙන්, මීට ඉහතදී රැස් වූ මෙම ජනාධිපති කොමිසම හමුවේදී වැඩ බලන පොලිස්පතිවරයා වගඋත්තරකාර පාර්ශවයේ සාක්ෂිකරුවෙකු ලෙස නම්කර තිබුණි.

මෙම පැමිණිල්ල යළි කැඳවූ අවස්ථාවේ ඉදිරිපත් වූ කරුණු සලකා බැලූ කොමිසමේ සභාපතිවරයා සී.ඩී වික්‍රමරත්න මහතාට ලබන 7 වැනිදා පෙනී සිටීමට නියම කර මෙම පැමිණිල්ල එදින කැදවීමට නියෝග කළේය.