(රංජන් කස්තුරි)
 
ශ්‍රී ලංකාවේ ඉස්ලාම් බැතිමතුන් රාමළාන් උත්සවය වෙනුවෙන් කොළඹ ගාලු මුවදොර පිටියේදී වාර්ෂිකව සංවිධානය කරනු ලබන ප්‍රධාන යාච්ඥාව මෙවර නොපැවැත්විණි.

ආරක්ෂක හේතු හා රටේ පවතින වාතාරවණය අනුව ප්‍රධාන යාච්ඥාව මෙවර නොපැවැත්වීමට ජමියතුල් උලමා සංවිධානය තීරණය කර තිබිණි.

රටේ කිසිදු ප්‍රදේශයක, ප්‍රධාන ස්ථානයක හෝ ක්‍රීඩාපිටියක යාච්ඥා මෙහෙයන් නොපවත්වන්නැයි ද ජමියතුල් උලමා සංවිධානය උපදෙස් ලබා දී තිබිණි.

කෙසේ වෙතත් ශ්‍රී ලංකාවාසී ඉස්ලාම් බැතිමතුන්ගේ ප්‍රධාන යාච්ඥාව අද(05) කොළඹ මහ පල්ලිය හෙවත් දවටගහ පල්ලියේදී පැවැත්වූ අතර දිවයිනේ අනෙකුත් ප්‍රදේශවල මුස්ලිම් බැතිමත්හු ද පල්ලිවලදී රාමළාන් යාච්ඥා පැවැත්වූහ.

දවටගහ පල්ලිය හා ඒ අවට අද දැඩි ආරක්ෂාවක් යොදවා තිබූ අතර යාච්ඥා මෙහෙයට සහභාගී වීමට පැමිණි බැතිමතුන්ද පරීක්ෂාවට ලක් කෙරිණි.

දිවයිනේ අනෙකුත් මුස්ලිම් පල්ලිවලටද ආරක්ෂක වැඩපිළිවෙළක් ක්‍රියාත්මක කර තිබිණි.