(දසුන් රාජපක්ෂ) 

එක්සත් ජාතික පක්ෂයේ පාර්ලිමේන්තු මන්ත්‍රී රංජන් රාමනායක මහතාගේ බලපත්‍ර අලුත් නොකළ ගිනි අවිය භාවිතා කර අපරාධයක් සිදුකර ඇති දැයි යන්න සම්න්ධයෙන් විමර්ශනයක් ආරම්භ කළ බව කොළඹ අපරාධ කොට්ඨාසය නුගේගොඩ මහේස්ත්‍රාත් ඒ.එම්. කේ වසන්ත කුමාර මහතා වෙත අද (7) දැනුම් දුන්නේය.

රජයේ රස පරීක්ෂකවරයා නිකුත් කළ  රස පරීක්ෂක වාර්තාවේ ගිනි අවිය සක්‍රීයව භාවිතා කර ඇති බව සහ ඉන් වෙඩි බෙහෙත් ගද වහනය වන බව දැනුම් දෙමින් කොළඹ අපරාධ කොට්ඨාසය අධිකරණය හමුවේ කරුණු වාර්තා කරමින් එලෙස දැනුම් දී සිටියේ ය.

මෙම සිද්ධියට අදාළ පැමිණිල්ල අද යළි කැඳවූ අවස්ථාවේදී වෙනත් නඩුවකට අදාළව  රිමාන්ඩ් බාරයට පත්කර සිටින පාර්ලිමේන්තු මන්ත්‍රී රංජන් රාමනායක මහතා බන්ධනාගාර නිලධාරීහු විසින් අධිකරණය හමුවට  ඉදිරිපත්  කරනු ලැබූහ.

සිදු කරන ලද පරීක්ෂණවල ප්‍රගතිය දැක්වෙන වැඩිදුර වාර්තාවක් මගින් කරුණු දැක්වූ කොළඹ අපරාධ කොට්ඨාසය මේ වන විට සිද්ධියට අදාළව පුද්ගලයන් පස් දෙනෙකුගෙන් ප්‍රකාශ සටහන් කර ගෙන ඇති බව දැනුම් දුන්හ. 

සැකකරුගේ නිවසේ තිබී අත් අඩංගුවට ගත් ගිනි අවිය සහ ජීව උණ්ඩ  118 සම්බන්ධයෙන්  රජයේ රස පරීක්ෂකවරයාගේ රස පරීක්ෂක වාර්තාව  කොළඹ අපරාධ කොට්ඨාසය වෙත ලබාදී ඇති බව ද කොළඹ අපරාධ කොට්ඨාසය දන්වා සිටියහ .

රස පරීක්ෂක වාර්තාවට අනුව ගිනි අවිය සක්‍රීයව භාවිතා කර ඇති බව ද ඉන් වෙඩි බෙහෙත් සුවඳ වහනය වන බවද රස පරීක්ෂකවරයාට නිරීක්ෂණය වී ඇති බව ද කොළඹ අපරාධ කොට්ඨාසය  පැවසීය .

රංජන් රාමනායක මහතා විසින් යම් අපරාධයක් කිරීම සඳහා එම ගිනි අවිය සක්‍රීය කළේද යන්න සම්බන්ධයෙන් විමර්ශනයක් සිදු කරන බව  සඳහන් කළ කොළඹ අපරාධ කොට්ඨාසය  මෙම ගිනි අවිය සම්බන්ධයෙන් රස පරීක්ෂක වාර්තා කැඳවා ඇති නිසා ගිනි අවිය සිය කොට්ඨාසය වෙත බාරදෙන ලෙස රජයේ රස පරීක්ෂකවරයාට නියම  කරන ලෙස ද ඉල්ලා සිටියේ ය.

අධිකරණයේ බාරයට ගෙන තිබෙන දුරකථන සංවාද ඇතුළත් හඬපට වල පිටපත් සිය කොට්ඨාසයට මේ වන තෙක් ලැබී නොමැති අතර ඉදිරි සතියේ දී ඒවා ලබා ගැනීමට කටයුතු කරන බව කොළඹ අපරාධ කොට්ඨාසය වැඩිදුරටත්  කීහ.

නීතිඥ මඩුල්ලක් සමග රංජන් රාමනායක මහතා වෙනුවෙන් පෙනී සිටි නීතිඥ අෂාන් ප්‍රනාන්දු මහතා කරුණු දක්වමින් කොළඹ අපරාධ කොට්ඨාසය භාරයේ තිබෙන සිය සේවා දායකයාගේ නිල ජංගම දුරකථනය සහ සිම් කාඩ් පත මුදා හැරීමට නියෝග කරන ලෙස ඉල්ලා සිටියේ ය .

එහි දී අධිකරණය ඇමතූ කොළඹ අපරාධ කොට්ඨාසය රංජන් රාමනායක මහතා දුරකථන සංවාද පටිගත කර ඇත්තේ මෙම දුරකථනය හරහා වන බැවින් විමර්ශන  අවසන් වන තෙක් එය මුදා හැරීමට නොහැකි බව පැවසීය .

ඉන් අනතුරුව නැවත අධිකරණය ඇමතූ නීතිඥ අෂාන් ප්‍රනාන්දු මහතා  මහජන නියෝජිතයකු වන සිය සේවාදායකයාගේ  සියලු දුරකථන දත්තයන් සහ සම්බන්ධතා එම දුරකතනයේ  තිබෙන සිම් පතෙහි අඩංගු වන බැවින් එම සිම් පතෙහි අංකයට සමාන සිම් පත් අංකයක් ගැනීමට අවසර දෙන ලෙස ඉල්ලා සිටියේ ය .

ඉන් පසු අධිකරණයට කරුණු දැක් වූ කොළඹ අපරාධ කොට්ඨාසය මෙම සියලු කරුණු සම්බන්ධයෙන් නීතිපතිවරයාව දැනුම්වත් කර උපදෙස් ලබා ගෙන ඉදිරි නඩු වාරයේදී අධිකරණය වෙත ඉදිරිපත්  කිරීමට බලාපොරොත්තු වන බව දන්වා සිටියේය.

ඒ අනුව ඉදිරිපත් වූ කරුණු සලකා බැලීමෙන්  පසුය  නීතිපති උපදෙස් ලබා ගෙන ඉදිරියේදී අධිකරණයට දැනුම් දෙන ලෙස කොළඹ අපරාධ කොට්ඨාසයට  නියම කළ මහේස්ත්‍රාත්වරයා  මෙම පැමිණිල්ල ලබන 12 වැනි දින යළි කැඳවීමට නියෝග කළේ ය .