(ඩී.ජී.සුගතපාල)
 
රත්ගම ද්විත්ව ඝාතන නඩුවේ   සැකකරුවන් 17දෙනා තව දුරටත් 25වන දින දක්වා රිමාන්ඩ්  බන්ධනාගාරගත කිරීමට ගාල්ල ප්‍රධාන මහේස්ත්‍රාත් හර්ෂණ  කැකුණවෙල මහතා අද (11)) නියෝග ක‍ළේය.
 
මෙසේ තව දුරටත් රිමාන්ඩ් කරනු ලැබුවේ දකුණු පළාත් විශේෂ අපරාධ විමර්ශණ ඒකකයේ හිටපු ස්ථානාධිපති  පොලිස් පරික්ෂක කපිල නිශාන්ත සිල්වා,උප පොලිස් පරික්ෂක එච්.ජී.විරාජ් මධුසංක, කොස්තාපල් එච්.ජී. සංජය චානක වන සංරක්ෂණ දෙපාර්තමේන්තුවේ වලස්මුල්ල කණුමල්දෙණිය රක්ෂිතයේ බිට්ටු නිලධාරි කංකානම්ගේ මාෂල් තුෂාර නලින්ද දකුණු පළාත් විශේෂ අපරාධ විමර්ශණ ඒකකයේ ස්ථානාධිපති ප්‍රධාන පොලිස් පරික්ෂක ඊ.ඒ.සමන් රෝහණ,  උප පොලිස් පරික්ෂක විදානගේ තිලකරත්න, කොස්තාපල් කොස්තාපල් උපුල් රංජිත් ,උප පොලිස් පරික්ෂක ඩබ්ලිව් .ආර්.විමලසිරි, උප පොලිස් පරික්ෂක ජී.කේ.විමලරත්න,සැරයන් පී.එච්.චමින්ද සැරයන් එස්.ජී.ප්‍රේමලාල්,කොස්තාපල් වයි.පි.විදානගම ,කොස්තාපල් බී.ඒ.ආර්.අසංක,පොලිස් රියදුරු එච්.එම්.එස්.ජයරත්න ,වලස්මුල්ල අඩවි වන නිලධාරි ආර්.එස්.සුවාරිස්,කොස්තාපල් අනිල් කුමාර,කොස්තාපල් රාගමුණිගේ විජිත කුමාර යන සැකකරුවෝ දාහත් දෙනාය.
 
 රත්ගම බූස්ස රත්නඋදාගම පදිංචිව සිටි ගොනාපිනුවලගේ  අසේල මංජුල කුමාර සහ කොස්ම රසික් චින්තක නමැති දෙදෙනා ඉකුත් ජනවාරි 23වනදින  පැහැරගෙන ගොස් ඝාතනය කොට පුළුස්සා දැමීම සම්බන්ධයෙන් මෙම සැකකරුවන් අත්අඩංගුවට ගෙන අධිකරණයට ඉදිරිපත් කිරීමෙන් පසු රිමාන්ඩ් බන්ධනාගාර ගත කරඇත.
 
පැමිණිල්ල  මෙහෙයවන අපරාධ පරික්ෂණ දෙපාර්තමේන්තුව වැඩිදුර වාර්තාවක් ඉදිරිපත් කරමින් වෑන් රථයේ සහ කැබ් රථයේ තිබී සොයාගත් හිසකෙස් මියගිය අයගේද නැතිනම් සැකකරුවන්ගේද යන්න පිළිබඳ රජයේ රස පරීක්ෂකවරයාගේ වාර්තාව තවම ලැබී නොමැති බවත් අත්අඩංගුවට ගැනීමට සිටින තවත් සැකකරුවෙකු මේ වනවිට ප්‍රදේශයෙන් පළාගොස් ඇති බවත් කියා සිටියේය.

මෙහිදි බන්ධනාගාර නිලධාරීන් අධිකරණයට කියාසිටියේ හිසකෙස් සාම්පල ලබා ගැනීම සඳහා සැකකරුවන් සියලු දෙනා රජයේ රස පරීක්ෂකවරයා වෙත ගෙනගිය බවය.
 
අපරාධ පරීක්ෂණ දෙපාර්තමේන්තුවේ සැරයන් අමිල (86099) යන මහතා විසින් පැමිණිල්ල වෙනුවෙන් කරුණු දක්වන ලදී.