අංජුල මහික වීරරත්න
 
ගමක මරණාධාර සමිතියක්වත් ව්‍යවස්ථාවක් උල්ලංඝණය කරන්නේ නැති බවත්, රටේ ව්‍යවස්ථාව උල්ලංඝණය කළ ජනාධිපති ගැන දැඩි කම්පාවකට පත්වන බවත් එක්සත් ජාතික පක්ෂ පාර්ලිමේන්තු මන්ත්‍රී නලීන් බණ්ඩාර මහතා මාධ්‍ය හමුවක දී අද (14) පැවසීය.

ඉදිරියේ පිහිටුවන එක්සත් ජාතික පෙරමුණු රජයකට ශ්‍රී ලංකා නිදහස් පක්ෂ මන්ත්‍රීවරුන් ගන්නවා නම් ඒ අය ගන්නේ තෝරා බේරාගෙන චෝදනා නැති ගැළපෙන අය පමණක් බව කී මන්ත්‍රීවරයා එලෙස එන්නට සූදානම් පිරිසක් දැනටමත් සාකච්ඡා අරඹා ඇති බවද පැවසීය.

කොළඹ අරලියගහ මන්දිරයේ පැවැති මෙම මාධ්‍ය හමුවේ දී අදහස් දැක්වූ බණ්ඩාර මහතා මෙසේ ද කීය.

“ඓතිහාසික තීන්දුව සමඟ අලුත් දේශපාලන න්‍යාය පත්‍රයක් ක්‍රියාත්මක වේවි. මෙය පක්ෂ, පාට භේදයකින් තොරව සන්තෝෂ විය හැකි කාරණයක්. 

රටක ව්‍යවස්ථාවට විශාල වටිනාකමක් ලැබුණා. ජයග්‍රහණයේ සැබෑ හිමිකරුවන් 2015 පෙරළියේ ජනවරම දුන් ලක්ෂ 62ක ජනතාවයි.
අපට මේ නායකත්වය රැකගන්න බැරිව කුමන්ත්‍රණය ක්‍රියාක්මක වුණා නම් විනිසුරුවරුන්ට ඇසිඩ් ගහන, මාධ්‍යවේදීන් මරණ යුගය නැවත එළඹෙනවා. මෙය සෑම අංශයකම ජනතාව ලැබූ ජයග්‍රහණයක් ”