(නිමල කොඩිතුවක්කු)

මතුව ඇති අවාසනාවන්ත තත්ත්වයෙන් රට මුදා ගැනීමට සියළුම දේශපාලන නායකයින් ප්‍රතිපත්තිමය එකඟත්වයට පැමිණෙන ලෙස ඉල්ලා සිටින බව සාධාරණ සමාජයක් සඳහා වන ජාතික ව්‍යාපාරයේ සභාපති හිටපු කථානායක කරු ජයසූරිය මහතා කොළඹදී පැවසීය.

ලෝකයේ විනාශ වූ රටවල් ශක්තිමත් රාජ්‍යයන් බවට පත්වූයේ ඒ ඇතිකරගත් එකගත්වය හා සමගිය තුළින් බැවින් මිත්‍රත්වයේ හස්තය සියලුම පුරවැසියන්ට දිගු කරන ලෙස රජයෙන් ඉල්ලා සිටින බවද ජයසූරිය මහතා සඳහන් කළේය.

ජාතික ආගමික හා ජාතික සංහිඳියාව සඳහා වන මොණරාගල දිස්ත්‍රික් සමුළුවේ දී අදහස් දක්වමින් ඔහු මේ බව පැවසීය.

“ජාති ආගම් භේද ඇති කිරීම සඳහා ඉතා සුළු පිරිසක් උත්සාහ කරනවා. ජාතික නායකයින්ට හා සමස්ත ශ්‍රී ලාංකික ජනතාවට අපි ආයාචනා කර සිටින්නේ රට නැවතත් ගිණි ගැනීමට ඉඩ නොදී ජාතික ආගමික සමගිය හා සහෝදරත්වය ගොඩ නගන ලෙසයි. දේශපාලනය මැතිවරණය කාලය තුළට සීමා කර තිබේ. අවාසනාවන්ත තත්ත්වයෙන් රට මුදා ගැනීමට සියළුම දේශපාලන නායකයින් ප්‍රතිපත්තිමය එකඟත්වයට පැමිණෙමු.

ලෝකයේ විනාශ වූ රටවල් ශක්තිමත් රාජ්‍යයන් බවට පත්වූයේ ඒ ඇතිකරගත් එකගත්වය හා සමගිය තුළයි. එමෙන්ම අපට ලෝකයේ තනි වෙන්නට බැහැ. අන්තර්ජාතික විශ්වාසය හා ගෞරවය අපි උපයාගත යුතුයි.

ප්‍රජාතන්ත්‍රවාදය සුරැකෙන මිනිස්  නීතියේ ආධිපත්‍ය රැකෙන, මිනිස් අයිතිවාසිකම් රකින, රටකට සංචාරකයින් හා ආයෝජකයින් පෙළගැසී පැමිණේවි. රජයෙන් ද අප ඉල්ලා සිටින්නේ මිත්‍රත්වයේ හස්තය සියලුම පුරවැසියන්ට දිගු කරන ලෙසයි” යැයිද ඔහු එහිදී පැවසීය.