(නාලක සංජීව දහනායක)

රාජ්‍ය ආයතන තුළ ගැටුම්කාරී තත්ත්වයක් ඇතිවීමට ඉඩ නොතබා සාමය ආරක්ෂා කර ගැනීමට කැපවන ලෙසට ජනාධිපති මෛත්‍රීපාල සිරිසේන මහතා වෘත්තීය සමිති නියෝජිතයන්ගෙන් අද (30) විශේෂ ඉල්ලීමක් කර ඇත.

ජාත්‍යන්තර වශයෙන් රටට අපකීර්තියක් ගෙනදීමට එක්සත් ජාතික පක්‍ෂය ප‍්‍රමුඛ ඇතැම් දේශපාලන පක්‍ෂ කටයුතු කරන බැවින් සියලුම රාජ්‍ය ආයතනවල සාමය පවත්වාගෙන යමින් රජයට සහය ලබාදීම වෘත්තීය සමිති නියෝජිතයන්ගේ වගකීම යැයිද ජනාධිපතිවරයා මෙහිදී පවසා තිබේ.

ශ්‍රී ලංකා නිදහස් පක්‍ෂයේ හා පොදුජන එක්සත් පෙරමුණේ වෘත්තීය සමිති නියෝජිතයන් අතර ජනාධිපති ලේකම් කාර්යාලයේ දී අද (30) පැවැති සාකච්ඡාවකදී ජනාධිපතිවරයා මෙම ඉල්ලීම කර තිබේ.

එහිදී රජයට පූර්ණ සහයෝගය පළකරන බව වෘත්තීය සමිති නියෝජිතයන් ජනාධිපතිවරයාට පොරොන්දුවී ඇත.

අමාත්‍ය මහින්ද අමරවීර, ගාමිණී ලොකුගේ , මහින්දානන්ද අලූත්ගමගේ යන පාර්ලිමේන්තු මන්ත්‍රීවරුන්ද මෙම අවස්ථාවට සහභාගි වූහ.