(මංගල එදිරිසිංහ)

මිනුවන්ගොඩ බ්‍රැන්ඩික්ස් ආයතනයේ සේවයේ නියුතු හොරණ කඳන්හේන ප්‍රදේශයේ පදිංචි පුද්ගලයකු කොරෝනා ආසාදිතයකු බවට අද (08) දහවල් නාගොඩ මහ රෝහලේ සිදුකරන ලද පී.සී.ආර්. පරීක්‍ෂණයෙන් තහවුරු වී ඇති බව නාගොඩ මහ රෝහලේ අධ්‍යක්‍ෂ වෛද්‍ය තමර කඑබෝවිල මහතා පැවසීය.

ඒ අනුව එම රෝගියා වහාම අයි.ඩී.එච්. රෝහලට මාරු කර යැවීමට කටයුතු කළ අතර ඔහුගේ බිරිඳ හොරණ මූලික රෝහලේ හෙදියක් වශයෙන් සේවය කරන බැවින් ඒ සම්බන්ධයෙන් හොරණ රෝහල් බලධාරීන්ට ද දන්වා යැවූ බව කඑබෝවිල මහතා වැඩිදුරටත් පැවසීය.

මේ සම්බන්ධයෙන් හොරණ මූලික රෝහලේ නියෝජ්‍ය අධ්‍යක්‍ෂ වෛද්‍ය ඉන්දික ධර්මරත්න මහතාගෙන් කළ විමසිමකදී ඔහු ප්‍රකාශ කර සිටියේ එම සිද්ධිය සත්‍ය බවත් රෝහලේ 5 වෙනි වාට්ටුවේ සේවය කළ එම හෙදිය සහ දරු දෙදෙනා පීසීආර් පරක්‍ෂණවලට ලක්කර මේ වන විට කන්දකාඩු නිරෝධායන මධ්‍යස්ථානයට යොමු කර ඇති බවයි. තවද අදාළ වාට්ටුවට මේවන විට කිසිඳු බාහිර පුද්ගලයෙකුට ඇතුළත්වීමට සහ පිටවීමට නොහැකිවන සේ තාවකාලිකව වසා දමා ඇත.

පවත්නා ඔනෑම හදිසි තත්වයකට මුහුණ දීම සඳහා හොරණ මූලික රෝහලේ පැරණි හදිසි ප්‍රතිකාර ඒකකය සහ අංක 01 වාට්ටුව කොරෝනා රෝගීන් ඇතුළත් කර ගැනිම සඳහා සුදානම් කර ඇති බවද ධර්මරත්න මහතා වැඩිදුරටත් පැවසීය.