(මුදිතා දයානන්ද)

මහ මැතිවරණයේදී තැබැරුම් බලපත්‍ර හිමි කිසිවෙකුට අපේක්ෂකත්වය මෙන්ම ඡන්දයද ලබානොදෙන්නැයි ශ්‍රී ජයවර්ධනපුර විශ්ව විද්‍යාලයේ කුලපති, ඉත්තෑපානේ ධම්මාලංකාර කෝට්ටේ ශ්‍රී කළ්‍යාණී සාමග‍්‍රී ධර්ම මහා සංඝ සභාවේ මහානාහිමියෝ දේශපාලන පක්ෂ නායකයින්ගෙන් හා ජනතාවගෙන් අද (10) ඉල්ලා සිටියහ.

මහානාහිමියෝ මේ බව සඳහන් කළේ ශ්‍රී ලංකා අමද්‍යප මහා සභාව කොළඹ 07 විජේරාම මාවතේ පිහිටි විපස්සනා භාවනා මධ්‍යස්ථානයේදී පැවති මාධ්‍ය හමුවකදීය.

මහනාහිමියෝ එහිදි මෙසේද පැවසූහ.

      ‘‘අමද්‍යප ව්‍යාපාරය ආරම්භ කළේ 1912දී කොළඹ ආනන්ද විද්‍යාලයේදී. 1917- 18 වන විට ශාඛා සංවිධාන සීයකට වැඩිය පිහිටුවන්න හැකිවුණා. 1918 සිට 1928 දක්වා කාලය තුළ වනවිට ශාඛා රා තැබෑරුම් 3818ක් අරක්කු තැබෑරුම් 4113ක් වසා දමන තරමට එය ප‍්‍රබල බලපෑමක් කළා. අපි ඒ අතීතය ගැන සතුටු වෙන්න පුලූවන්.

වර්තමානයේ වසරකට දුම්පානයෙන් 220,000ක් පමණ මිය යනවා. මධ්‍යසාරයෙන් 18,000ක් පමණ මිය යනවා. අනෙතුත් මත්ද්‍රව්‍ය භාවිතයෙන් 2000ක් පමණ මිය යනවා.

වසරකට කෝටි දෙකහමාරක් පමණ දුම්වැටි හා මත්පැන් වෙනුවෙන් සාමාන්‍ය ජනතාව වැය කරනවා. ඉදිරියේදී තරුණ වැඩපිළිවෙළ, විහාරස්ථාන ආශ‍්‍රිතව වැඩසටහන්, වැඩිහිටියන් ආශ‍්‍රිත වැඩසටහන් ආදී ලෙස අපි වැඩසටහන් රැසක් දියත් කර මත් උවදුර පරාජය කිරීමට සැලසුම් කර තිබෙනවා.

මත්උවදුරෙන් මේ සමජය මුදවා ගැනීමේදී අමද්‍යප මහා සභාවට පැවරි ඇති කාර්ය භාරය ඉතා විශාලයි‘‘.

(ඡායාරූප - රොමේෂ් ධනුෂ්ක සිල්වා)